No. of :

No. of Shares:

Currently viewed by: Marcus Rosit

  1. Home
  2. News
  3. ‘Forest bathing’ ginaduso sa Antique sa pagprotekta kang kagubatan

‘Forest bathing’ ginaduso sa Antique sa pagprotekta kang kagubatan

Write a comment

Delete

SAN JOSE, Antique (PIA) -- Ginaduso kang Environment and Natural Resources Office (ENRO) sa dya nga probinsya ang “forest bathing” para sa pagprotekta kang palibot kag dunang manggad.

Ang forest bathing, ukon ang pag-liwa-liwa sa kagubatan, ginapatihan nga sangka sahi kang “eco-therapy” kontra sa stress kag makabulig tugro inspirasyon sa publiko nga protektaran ang kagubatan.

Delete

Sa pag-obserbar kang Philippine Environment Month 2023, ang ENRO kag Department of Environment and Natural Resources (DENR) ginpangunahan ang selebrasyon kang tuigan nga “Pista kang Kagubatan” paagi sa forest bathing sa Sibalom Natural Park (SNP).


Kang Hunyo 30, kapin 300 ka mga indibidwal, kalabanan halin sa provincial government offices kag national government agencies (NGAs), ang nagpadulong sa SNP nga sangka protected area para magbulig sa pagpasanyog kang importansya kang kagubatan kag palibot.

Delete

Sa sangka programa sa radyo, ginhambal ni Senior Environmental Management Specialist Jennifer Juliano nga ang Pista kang Kagubatan, sa bisa kang Provincial Ordinance No. 2015-109, sangka importante nga tikang sa pag-preserbar kang malapad nga kagubatan kang Antique.

Dya bangod ginatugruan oportunidad kang nasambit nga aktibidad ang publiko nga mas maparapit sa kagubatan, makasimpatya sa mga isyu kag problema nga ginaatubang kang palibot kag dunang manggad, kag maintindihan nga ang kalibutan sara lang kag dapat gid protektaran.

Delete

Ang Sibalom Natural Park nga may kalapadon nga 6,778 ka ektarya sangka sanktwaryo para sa nanari-sari nga tanom kag kasapatan pareho kang Rafflesia speciosa, Amorphophallus, pit viper, hornbill, Visayan Warty Pig, Visayan Spotted Deer, kag duro pa.

Ang Parke sara man ka “catchment” area para sa darwa ka daragkol nga suba kang Mau-it kag Tipulu-an nga ginahalinan kang irigasyon para sa mga kabanwahanan kang San Remigio, Sibalom, San Jose, Hamtic, kag Belison.

Gintugruan igtalupangod man kang ENRO nga ang pagprotekta sa kagubatan nagaprotekta man sa mga “watershed” nga ginahalinan kang suplay kang tubig sa mga komunidad.

Delete

Sa sangka mensahe, gin-agda ni Antique Environment and Natural Resources Officer Vivian T. Marfil ang mga Antiqueño nga mag-ulikid sa palibot kag duna nga manggad, bisan sa gamay nga pamaagi kang “waste segregation” kag pag-obserbar kang “Refuse, Reduce, Reuse, and Recycle.” (AGP/BPS/PIA Antique/Photos courtesy of ENRO Antique)

About the Author

Bernard Ceasar Susbilla

Information Officer

Region 6

Electronics Engineer/Writer

Related News

Feedback / Comment

Get in touch