TAGBILARAN CITY, Bohol, July 17 (PIA) -- Aduna ka bay gisi-gisi ug hugaw nga mga kwarta? Mahimo na kining paalisdan og tuskig ug bag-ong mga sensilyo pinaagi sa Piso Caravan sa Bangko Sentral ng Pilipinas (BSP) Visayas Regional Office.

Ang BSP nag-awhag sa publiko sa pagpahimulos sa mga serbisyo nga itanyag sa Piso Caravan Program dinhi sa lalawigan sa Bohol gikan Hulyo 18 hangtod 21, 2023.

Sa Hulyo 18 ug 19 (Martes ug Miyerkols), ipahimutang ang Piso Cavaran sa Old Tagbilaran Airport ning dakbayan gikan alas 9 sa buntag hangtod alas 4 sa hapon.

Uban kini sa Sandugo Agricultural Fair 2023, sa pakigtambayayong sa Provincial Government of Bohol (PGBh).

Sa Hulyo 20 (Huwebes), moadto ang Piso Caravan sa Rue de Premier, Alona Carpark, sa lungsod sa Panglao gikan alas 9 sa buntag taman alas 3 sa hapon.

Samtang sa Hulyo 21 (Biyernes), mahimong magpailis sa mga gisi ug hugaw nga mga kwarta didto sa Sandugo Trade Expo, Activity Area sa lsland City Mall ning syudad sa Tagbilaran gikan alas 10 sa buntag taman alas 2 sa pales.

Sa Piso Caravan Program sa BSP, dawaton ang mga sinsilyo nga kauban sa mga kwartang naa sa sirkulasyon karon.

Mahimo kini mapailisan og kwartang papel kung ang kantidad niini P20.00 pataas.

Subay sa Piso Caravan, ilisan sa BSP ang mga gisi-gisi o hugaw nga mga papel de bangko ug mga sensilyo. Naglakip kini sa mga salaping papel nga adunay mga gisi, mga buslot, mga marka, ug mga kadaot ug uban pa. (ECB/PIA7 Bohol)