TAGBILARAN CITY, Bohol, July 17 (PIA) -- Dungan sa paglusad sa ‘Kadiwa Ng Pangulo’ (KNP) sa tibuok nasud, gisaksihan ni Presidente Ferdinand R. Marcos Jr. niadtong Hulyo 17, 2023, ang ceremonial signing sa memorandum of agreement (MOA) sa KNP sa lungsod sa San Fernando, Pampanga, nga nagtumong sa pag-institutionalize ug pagpatunhay sa pagtukod og KNP sa lokal nga lebel pinaagi sa kolaborasyon sa mga ahensya.
“Dito sa MOA na ito talagang pinaghahatian ng local government at saka national government ito. Hindi kayang gawin ng national government na maikalat lahat ng ating gustong ipadala na mga murang pagkain kung hindi ating kasama at ka-partner ang local government,” matud pa ni Marcos atol sa kalihokan nga gipahigayon sa Pampanga Provincial Capitol.
Ang Presidente miingon nga adunay panginahanglan sa pagpausbaw sa produksiyon aron mapadayon ang programa sa Kadiwa ug mamentinar ang barato nga presyo sa mga nag-unang panaliton nga mopabor sa mga konsumidor, nga mahimo pinaagi sa tabang sa nagkalain-laing sektor.
Aron makab-ot kini nga tumong, si Marcos miingon nga ang Department of Agriculture (DA), uban sa tabang sa ubang mga ahensya, naningkamot sa pagpausbaw sa produksyon sa bugas ug isda, ingon man pagpangita sa mga solusyon sa mga sakit nga naghampak sa mga industriya sa kahayopan ug manok.
Sa sektor sa pangisda, siya miingon nga ang gobyerno nagbutang og mga cold storage facility sa mga coastal areas aron mamenosan o malikayan ang pagkadaut, nga matod niya nga moabot sa 20 ngadto sa 30 porsyento.
Ang Kadiwa nga programa usa ka farm-to-consumer market chain nga nagwagtang sa mga intermediary, nga nagtugot sa mga lokal nga prodyuser nga makamugna og mas taas nga kita pinaagi sa pagbaligya sa ilang produkto direkta ngadto sa mga konsumidor.
Ang MOA sa KNP gisudlan sa DA, Department of Trade and Industry (DTI), Department of Labor and Employment (DOLE), Department of Social Welfare and Development (DSWD), Department of the Interior and Local Government (DILG), Presidential Communications Office (PCO), ug Presidential Management Staff (PMS).
Ubos sa kasabutan, ang DA maoy magsilbi nga lead convenor sa mga operasyon sa Kadiwa ng Pangulo, samtang ang DTI, DOLE, ug DILG maoy magsilbi nga co-convenors. (ECB/PIA7 Bohol)
