Ang SCAT sangka pamaagi sa pag-survey kang mga baybayon nga apektado kang oil spill kag nagagamit kang “standardized” nga terminolohiya sa pag-usisa kang kondisyon kang oil spill.

Ang mga SCAT “endpoints” nga nalambot rason nga gindeklarar nga positibo ang pagpaninlo sa mga apektado nga lugar amo ang mga masunod: wara ti maisog nga baho kang krudo, wara ti kitaon nga krudo ukon mga “debris” nga may krudo sa mga pangpang, wara ti nagahining nga krudo sa katubigan, kag iban pa.

Apisar nga nalambot ang mga endpoints kang SCAT base sa ginpatigayon nga assessment kang IATF, limitado ang nangin aksyon sa mga bakhawan tungod nagapati ang mga eksperto nga mas bahul ang mangin kahalitan kung tandugon ang sensitibo nga mga tanom.

Hindi pa man ma-anunsyar kang IATF nga tapos ron ang cleanup tubtob indi maubos dara sa waste disposal area sa probinsya kang Batangas ang tanan nga mga krudo, basura, kag kontaminado nga mga materyales nga nakolekta.

Sa report kang Coast Guard District Western Visayas (CGDWV) kang Hulyo 3, marapit 149,540 ka kilo kang “debris” ukon basura nga may krudo, 155,460 ka kilo kang baras nga may krudo, kag 3,045 ka litro kang kontaminado nga tubig ang nakolekta halin kang nag-umpisa ang cleanup.

Ginreport man kang CGDWV nga 6.383 ka kilometro kang baybayon ang natinlu-an ron sa 6.72 ka kilometro kang apektado nga baybayon, ukon 95 porsyento nga binuhatan.