ODIONGAN, Romblon (PIA) -- Siyam (9) na patay na pawikan, karamihan ay mga babae, ang magkasunod na natagpuan ng mga residente ng limang barangay sa Romblon, Romblon sa loob lamang ng anim (6) na araw simula Hulyo 27, 2023.
Ayon sa ulat ng Municipal Environment & Natural Resources Office (MENRO) ng bayan ng Romblon, ang mga pawikan ay natagpuan ng mga residente sa mga barangay ng Hinablan, Agnipa, Agpanabat, Lunas, at Calabogo.
Ayon kay MENR Officer Psyche Mariño, posibleng dynamite fishing ang dahilan nang mga pagkamatay ng mga pawikan dahil sa pare-pareho ang tama ng mga ito. Ito ay base na rin sa initial assesment ng Biodiversity Management Bureau ng Department of Environment and Natural Resources (DENR) na ibinahagi kay Mariño.
"Almost everyday ay may inirereport sa aming mga patay na pawikan. Alam na ito ni Mayor at makikipagpulong na sa iba't ibang concerned agencies kaugnay dito," pahayag ni Mariño.
Sinabi ng Bureau of Fisheries and Aquatic Resources-Romblon na wala pang ulat sa kanila ang MENRO Romblon kaya hindi pa sila makakapagbigay ng pahayag.
