SAN JOSE, Antique (PIA)  -- Ang Department of Trade and Industry (DTI) nagpagwa run kang bag-o nga Suggested Retail Price (SRP) ukon listahan ka presyo kang school kag office supplies parehas kang notebook, papel, lapis, ballpen, krayola kag iba pa.

Si Trade and Industry Development Specialist Arnel Oliveros naghambal nga dya nagatuyo sa pagpamaan sa mga katawhan kang presyo kang nasambit nga baraklon agud malikawan ang sobra nga taas nga presyohanay sa tindahan ilabi na gid nga manugbukas na ang klase.

Dya magaserbe man nga giya sa mga tag-iya kang tindahan sa anda pagpresyo kang schools kag office supplies.

Si Oliveros nagdugang hambal nga ang pagsaka kang presyo kang iba nga school supplies amo tungod sa pagtaas man kang presyo kang mga materyales na kadya.

Ginapanugyan kang DTI sa mga tindahan nga sundon ang dya nga SRP samtang ang mga konsumidor ginpanugyan man nga lantawon anay ang SRP antes magbakal para may ideya na ka presyohanay.

Nag-umpisa run man ang pagmonitor kang DTI kag pag-inspeksyon kang mga department stores kag iba pa nga establisyemento para nga masigurado ang pagsunod kang SRP. (AGP/PSM/PIA Antique with reports from Fema Galicia)