TAGBILARAN CITY, Bohol, Aug. 7 (PIA) -- Usa ka libo ka kahoy nga native ug endemic sa Bohol ang ipapuli sa Department f Environment and Natural Resources (DENR-7) sa matag acasia nga giputol aron lamang malugaran ang pagpabarug sa usa ka gasoline station sa Baguio Drive sa Taloto District ning syudad.
Kini maoy nahilakip sa rekomendasyon sa DENR 7 ngadto sa ForestView Realty Development Inc., ang kontraktor nga maoy natahasan sa Shell Philippines nga magtukod sa ilang gasoline station.
Nahalipugwat ang mga Bol-anon diha nga namat-an na lang nga natumba na human gigabas ang labing menos upat ka dagkong punuan sa acasia didto sa eskina sa Taloto paingon sa Seminaryo, ug may mga punuan pa sa bangkaw nga gipangtumba usab.
Gibutyag usab ni City mayor Jane Yap, nga base sa permit nga giduso sa ForestView Realty Development Inc., wala didto magsulti nga magtumba sila og mga kahoy sa ilang proyekto.
Gani, butyag sa babaye nga mayor nga dako ang lote nga tukoran sa gasolinahan ug dili na kinahanglan pa nga maputol pa ang mga kahoy.
Kahinumduman nga pinaagi ni Bise Gobernador Victor Dionisio Balite, nangayo ang SP sa DENR sa incident ug progress report kabahin sa ilang gipaimbestigahan nga pagputol sa mga acasia, nga gibanabana nga sobra na sa usa ka gatus ka tuig ang panuigon.
Ang nasampit nga mga acasia usab maoy gitumbok nga rason ngano nga bugnaw ang Little Baguio Drive.
Sa incident report nga gipaambit sa DENR 7 ngadto sa Sangguniang Panlawigan, nakit-an didto nga gimandu sa DENR ngadto sa Forestview Realty Development Inc ug sa Shell Philippines, kinsa maoy tag-iya sa project, sa pagtanum og labing menos 4,000 ka punuan nga mga kahoy nga iya sa Pilipinas, aron ipuli sa naputol nga acasia.
Ang acasia, dili man tumindok nga kahoy sa Pilipinas ug gidala lamang sa mga Kastila, usa sa mga kahoy nga gitangtang na sa mga kahoy nga gipanalipdan sa balaod.
Agi og hulip niini, matud sa DENR, mga tumindok nga kahoy nga kasagaran nagdaghan sa mga kalasangans a Bohol aron ipahiuli sa yuta ang itanum sa kontraktor ug tag-iya sa proyekto, didto sa lugar diina ng DENR nagpahimutang sa ilang National Greening Program.
Nunot usab niini, mingpasa usab og resolusyon ang SP ngadto sa kontraktor ug sa tag-iya sa proyekto, sa report of compliance, aron mailhan kon gituman ba usab ang mandu sa ahensya sa kalikopan. (RAHC/PIA-7 Bohol)
