TAGBILARAN CITY, Bohol, Aug. 25 (PIA) -- Nipasidaan ang Technical Education and Skills Development Authority (TESDA) batok sa paggamit sa pangalan sa ilang ahensya sa pagpamaligya og detergent powder sa kadalanan.

Kini human nikatap sa social media ang reklamo sa mga nabiktima sa giingong mga scammer o mangingilad nga nigamit sa pangalan sa TESDA sa pagpamaligya og sabon nga Pure Bright Detergent Powder 500 grams diin ang 5 kabuok nagkantidad og P498.

Matud pa nga ang tumong sa mga namaligya mao nga angay maka-baligya sila sa mga sabon aron maka-gradwar.

Giingong requirements sa TESDA nga makabaligya sila isip rekisistos aron makakuha og National Certificate (NC) 2.

Ang top management sa TESDA-Bohol Provincial Office uban sa koordinasyon sa ilang kwarentay tres (43) ka Tech-Voc Institutions (TVIs) sa tibuok probinsya mipagawas og pahayag nga wala silay instruksiyon sa pagbaligya og detergent powder isip rekisitos sa pag-isyu og National Certificates o isip pre-requisite alang sa pagkumpleto sa programa sa pagbansay.

Matud pa nga gi-report na kini sa TESDA- Bohol Provincial Office ngadto sa Tagbilaran City Police Station.

Gi-awhag usab ang publiko sa pagtaho sa kapolisan kun sila mahanyagan usab sa maong mga scammer o mangingilad. (ECB/PIA7-Bohol)