ILIGAN CITY (PIA)--Gisugdan na ang month-long celebration sa Diyandi Festival dinhi human nga gipahigayon ang opening salvo.
Sa pagbukas sa Diyandi Festival, gihimo sa mga Higaonon ang ritwal nga pagpananghid nga usa ka pagyukbo sa "Magbabaya" alang sa maayong ani ingon man sa malamposon nga selebrasyon.
Gikan sa Higaonon nga pulong nga nagpasabot og pagsaulog, ang Diyandi festival ginabida ang pagkahiusa sa tri-people sa Iligan, ang mga Kristyano, Maranao ug Higaonon. Atol sab kini sa pagpasalamat kay Senior San Miguel, ang patron nga santo sa mga Iliganon.
"We must remember that this celebration would not be complete, without acknowledging the guardian spirits of our patron saint, St. Michael the archangel," sumala ni Jules Verne Padilla, chairperson sa Executive Management Board sa Diyandi Festival.
Samtang, gipasiugda ni Mayor Frederick Siao ang importansya sa Diyandi Festival isip representasyon sa adunahang kabilin ug talagsaong talento sa dakbayan.
Kining Diyandi usa ka testamento usa ka rich heritage ug talagsaong nga talento sa atong katawhan. Mao kini ang panahon sa pag-celebrate sa nagkalain-laing ug ipakita ang atong unique quality that makes Iligan City truly exceptional," sumala niya.
Gipahigayon sab ang unang cheerdancing competition diin nasakmit sa Barangay Tomas Cabili ang grand prize ug midaog ug P50,000. Nakuha sab nila ang Best in Chant ug Best in Costume awards.
Samtang, 1st runner up ang Barangay Luinab ug nakadaog og P30,000 ug second runner-up ang Barangay Upper Hinaplanon ug nakakuha og P20,000.
"Unta mapadayan pa jud siya every year, para daghang participants nga mga kabatan-onan ngam uapil ani kay para dili bitaw mapadulong sa dili mao nga landas ang mga tao," sumala ni Ian Cabusas, contingent sa Barangay Upper Hinaplanon.
Atol sa opening salvo, gipaila sab ang mga kandidato sa Ms. Iligan, Diyandi King, Mr. Iligan and Lanao del Norte, ug Ms. Gay Iligan. Nag-perform sab ang The Fiero Fire Dancers nga grand finalists sa Pilipinas Got Talent ug si Mariane Osabel, usa ka Iliganon ug grand champion sa The Clash sa GMA-7. (LELA/PIA-10/Lanao del Norte)
