SAN JOSE, Antique (PIA) -- Ang pagbukas kang University of the Philippines Visayas- Extension Campus sa Pandan, Antique magatugro kang mas duro nga oportunidad sa mga Antiqueños.

Dya suno sa mga opisyales kang University of the Philippines (UP) kag lokal nga lideres.

Sa programa nga ginhiwat kag inagurasyon kang amo nga edipisyo, si UP President lawyer Angelo A. Jimenez  kag UP Visayas Chancellor, Dr. Clement C. Camposano, nangako nga sanda magapa-ambit kang programa kag serbisyo kang UP system sa probinsya paagi sa pagbukas kang UPV extension campus sa banwa ka Pandan.

Ang pagtukod kang UP Antique extension campus suno kay Senate President Pro Tempore Loren Legarda, magatinguha magtugro kang pormal nga edukasyon, maghatag diploma, kag maghalad kang oportunidad sa paghanas sa mga Antiqueños, nga makabulig sa pagpa-uswag kang anda kabuhi kag ekonomiya ka probinsya.

Ang Antiqueña nga senador naghambal man nga ang pagtukod kang UP extension ampus mangin yabi sa pagpatuman ka pira ka mga programa pang-edukayon kalakip ang mga pagtuon sa parangabuhi-an kang mga Antiqueños.

Nagpahayag man kang paglaum si mayor Mary Jean N. Te ka Libertad, kaingud nga banwa ka Pandan, nga ang extension campus makabulig sa mga lamharon nga henerasyon.

Para kay UA President Pablo S. Crespo Jr., ang nasambit nga hirikuton magabukas  kang mas duro nga kolaborasyon sa tunga ka UA kag UP tuhoy sa training, research, kag extension services.

Sa bahin ni Chancellor Camposano, tana gilayon naghayag ka mga plano pagkatapos magbukas ang extension campus, kaangay kang training programs sa nanari-sari nga topiko pareho kang entrepreneurship, sustainability, kag mga kurso sa fisheries. (AGP/PSM/PIA Antique with reports from Aerielle Jan N. Castillon/GIP)