Masadya man si Junior kay bisan tigulang na, siya gintugutan gihapon nga makatapos sang elementarya kon sa diin iya pagagamiton ang mga natun-an sa pagbalik niya sa komunidad. 

“Dako gid ang pagpasalamat ko sa BJMP kay wala gid sila nagpabaya nga mangin maayo kami, kag sa DepEd, dako man akon pagpasalamat kay na dugang-dugangan ang akon na bal-an,” dugang ni Junior. 

Isa man sa mga nag-gradwar nga preso amo si alyas “Bench” nga naga-edad 51 anyos kon sa diin dako gid ang iya pagpasalamat sa DepEd, Roxas City government, kag sa BJMP kay gin hatagan siya sang oportunidad para magtuon sang dugang nga ihibalo nga rason agud ini makakuha sang mas manami nga obra kon matapos na ang iya sentensya sa sulod sang presohan. 

“Ang plano ko kay naka graduate ko diri, padayunon ko ang akon pag-eskwela kag tapuson ko ang akon senior high kay kung makatapos ko dira, dako gid ini nga bulig para sa akon. Pag-gwa makapangita ako sang maayo nga trabaho,” suno kay Bench. 

Sa bahin ni Roxas City mayor Ronnie Dadivas, iya ginkilala ang reformation program sang DepEd bilang isa ka maayo nga inisyatibo para makapabalik sang dignidad kag makahatag sang paglaum sa mga preso. 

“Pananglitan makaguwa na sila sa presohan, may ara sila sang bitbiton nga ihibalo kag sertipiko nga sarang ma-gamit sa pagpangita sang trabaho kag mangin mapinuslanon nga miyembro sang ila pamilya kag komunidad,” dugang ni Dadivas. (AGP/PLF/PIA Capiz)