SYUDAD SANG ILOILO (PIA) -- Gintugyan na sang Department of Public Works and Highways (DPWH) 6 ang isa ka multipurpose facility nga nagabalor P48.6-milyones diri.

Ang pasilidad nga nahamtang sa Barangay Sooc, distrito sang Arevalo, may yara nga covered basketball court nga mahimo mangin evacuation center kag mag-akomodar sang kapin 196 ka mga pamilya ukon 500 ka mga indibidwal.

Sa iya mensahe sa ginhiwat nga ceremonial turnover, ginsiling ni DPWH 6 OIC-Regional Director Sanny Boy O. Oropel nga ang pasilidad mahimo nga mangin evacuation center para sa mga “displaced individuals” bangud sa nagkalain-lain nga emerhensya ukon kalalat-an.

Dugang pa ni Oropel, ang kapuslanan sang multipurpose building indi lamang tungod sa iya pisikal nga istruktura kundi ini nagarepresentar man sang kaangay nga tinutuyo sang mga pumuluyo nga seguridad sa ti-on sang mga kalalat-an bangud ini nagalakip sang kumpleto nga mga pasilidad.

Dugang pa diri, ini may yara man nga anaerobic baffled reactor generator room kag transformer.

Suno kay Oropel, nakumpleto na sang DPWH 6 ang 25 ka regional evacuation centers sa Western Visayas kon sa diin 13 sa mga ini ang sa Panay, 2 sa Guimaras, kag 10 sa Negros Occidental. May isa man sini nga padayon pa ginatukod sa karon sa syudad sang Sipalay.

“As we enhance our disaster response capabilities, we also strengthen the bonds that unite our community. Hence, this building/evacuation center is a tangible manifestation of our collective responsibility and strong determination to stand strong in the face of adversity in order to ensure the safety and security of our fellow Ilonggos,” siling ni Oropel. (AAL/AGP/PIA 6 with reports from DPWH 6)