ILOILO CITY (PIA) -- Ginaganyat sang Department of Energy (DOE) Visayas Field Office sa mga pamilya nga nalakip sa Pantawid Pamilyang Pilipino Program (4Ps) kag mga kubos nga magparehistro sa Lifeline Rate Subsidy Program sang gobyerno agud nga makabaton sang diskwento sa balayran sa kuryente.

Ini ang ginpahayag ni Engr. Jose Rey Maleza, nagapamuno sa Energy Industry Management Division DOE-VFO sa isa ka online Kapihan program sang Philippine Information Agency (PIA) 6.

Suno kay Maleza, wala sapayan kun ang isa ka pamilya katapo sang 4Ps, kinahanglan gihapon magparehistro sa natungdan nga power distribution utility (DU) ukon sa electric cooperative (EC) agud nga malakip sa programa kag makabaton sang diskwento.

Ginasundan ini sang MORE Electric and Power Corporation (MORE) nga sakop ang syudad sang Iloilo nga may 2,284 – 1,509 ang 4Ps kag 775 ang indi 4Ps; Aklan Electric Cooperative, Inc. (AKELCO) – 972 (953 kag 19); Northern Negros Electric Cooperative, Inc. (NONECO) – 465 (tanan 4Ps); Iloilo I Electric Cooperative, Inc. (ILECO 1) – 447 (399 kag 48); Capiz Electric Cooperative, Inc. (CAPELCO) – 365 (tanan 4Ps); Iloilo III Electric Cooperative, Inc. (ILECO 3) – 365 (195 kag 161); Antique Electric Cooperative, Inc. (ANTECO) – 188 (175 kag 13); Guimaras Electric Cooperative, Inc. (GUIMELCO) – 86 (84 kag 2); Central Negros Electric Cooperative, Inc. (CENECO) – 45 (39 kag 6); kag Northern Negros Electric Cooperative, Inc. (NONECO) – 30 (tanan 4Ps).

Apang, sa bug-os nga Kabisayaan Nakatungdan, sandig sa datos sang DSWD 6, kabug-osan sang 328,239 ka mga panimalay ang nalakip sa 4Ps program tubtob Agosto 2023 kag kabug-osan sang 536,998 ang ginakabig nga mga kubos sa idalom sang National Household Targeting System for Poverty Reduction (NHTS-PR) sang ahensya ukon ang ginatawag nga Listahanan 3.0 nga ginapaguwa sang Hulyo 2022.

Ini nga mga pamilya ang ginakilala nga kwalipikado nga magpartisipar sa programa sandig sa Republic Act No. 11552, nga ginpasar sang Mayo 2021, nga nagapalapad kag naga-improbar sang implementasyon sang Lifeline Rate agud masiguro nga padayon nga makabaton sang diskwento sa ila bill sa kuryente ang kwalipikado nga mga panimalay.

Dugang pa diri, ang mga marginalized end-users nga makasulod sa program amo ang mga konsumidor nga may bulanan nga power consumption nga indi magsobra sa 100-kilowatt hours (kWh).

Agud nga makaparehistro sa Lifeline Rate program, ginaabisohan ang mga pamilya nga benepisyaryo sang 4Ps nga kinahanglan magsumitir sa natungdan nga DU ukon EC sang nasabtan nga application form, pinaka-ulihi nga electricity bill, kag isa ka valid ID gikan sa gobyerno nga nalakip ang ila pirma kag address.

Apang, para sa iban pa nga mga marginalized end-user nga wala nalakip sa 4Ps beneficiaries pero sakop sang Listahanan 3.0 ang kinahanglan nga magsumitir sang sertipikasyon gikan sa ila lokal nga Social Welfare Development Office (SWDO) nga ginahatag sa sulod sang anom ka bulan antis ang pagparehistro kag nalakip ang kita sang pamilya. Dugang pa sa isumitir ang nakumpleto sabat nga application form, pinaka-ulihi nga electricity bill, kag isa ka valid ID gikan sa gobyerno nga nalakip ang ila pirma kag address.

Sa pihak nga bahin, ginpahayag man ni Maleza nga ang kantidadn sang diskwento nga igahatag sa mga kwalipikado nga marginalized end-users ang nagadepende sa prevailing rates sang ila mga DU ukon EC.

Para sa mga pamangkot, maghimo nga magbisita lang sa pinakamalapit nga DU branch ukon EC sub-station sa ila lugar ukon magtawag sa masunod nga Lifeline Program hotline number sang Energy Regulatory Commission (ERC) sa (63) 905-343-2292. (AAL/FRG/PIA6)