TAGBILARAN CITY, Bohol, September 12 (PIA) -- Ang Probinsya sa Bohol ug upat ka mga municipal Local Government Units (PLGU/MLGU) kauban sa mga recipient barangays sa Department of Agriculture-Philippine Rural Development Projects (DA-PRDP) ang nakadawat og plaques of recognition ning bag-o lang alang sa pagsiguro sa kalidad nga mga pasundayag sa pagpatuman sa mga subproyekto.

Ang Probinsya sa Bohol giila sa ilang maayong pagdumala sa pagpatuman sa mga subproyekto sa PRDP, samtang ang mga lungsod sa Sagbayan, Catigbian, Balilihan ug Inabanga gihatagan og award alang sa pag-angkon og "good ratings" atol sa pagpahigayon sa Operations and Maintenance Audit (OMAS) sa nahuman nga farm- to-market road (FMR) subprojects.

Ang OMAS gipahigayon sa DA-PRDP Regional Project Coordinating Office-7 (DA-PRDP RPCO7).

Ang pag-ila nga gihatag sa RPCO7 nagsilbi nga pamatuod nga ang mga hingtungdan nga LGUs tinud-anay nga nagmintinar sa pag-atiman sa FMRs nga gi-evaluate ug gi-audit sa PRDP-RPCO7 Regional Operation and Maintenance Audit Team (ROMAT).

Si Engr. Cirilo N. Namoc, DA-7 RAED Chief ug PRDP RPCO-7 I-BUILD Component midayeg sa mga benepisyaryo sa LGU sa ilang suporta ug performance nga gipakita sa positibong resulta sa proyekto.

“Kanang mga plaka (plaques) diha ug ang inyo presensya maoy usa sa rason nganung gi’approve atoa Scale-Up, kay maayo og performance ang original (loan) ug ang additional financing 1 and 2 (AF1 & 2) implementation of the PRDP subprojects”, matud pa ni Engr. Namoc.

Sa mensahe sa pagdawat, si Sangguniang Bayan Member Edgar Asilo sa MLGU Balilihan, nipadayag sa iyang pasalamat sa DA-PRDP sa subproject kay nakahatag kini og mga benepisyo ug kalamboan sa ilang lugar tungod sa FMR.

“Dako kaayo ang natabang sa amo lungsod pinaagi aning programa ug proyekto sa PRDP, labaw na ang atong mag-uuma ingon usab ang atong mga estudyante nga nakapasayon sa pagpadangat sa ilang mga produkto sa merkado ug pag’adto didto sa ila tunghaan” matud pa ni Asilo. (ECB/PIA7-Bohol)