TAGBILARAN CITY, Bohol, October 3 (PIA) -- Gipagawas sa Malacañang ang Memorandum Circular No. 34 nga nagmando ug nag-awhag sa mga ahensya sa nasudnong kagamhanan ug mga local government units (LGUs) sa pagsuporta sa mga kalihokan sa senior citizen atol sa tinuig nga pagsaulog sa _Linggo ng Katandaang_ Filipino (Elderly Filipino Week).

Sa Setyembre 29-memorandum nga gilagdaan ni Executive Secretary Lucas Bersamin, ang Palasyo nimando sa National Commission of Senior Citizens (NCSC) sa pagpanguna sa pagpahigayon sa mga kalihokan ug mga programa sa pagsaulog sa Elderly Filipino Week, subay sa mandato niini ubos sa Republic Act. RA 11350, o ang “National Commission of Senior Citizen Act”, aron masiguro ang hingpit nga pagpatuman sa mga balaod, polisiya ug programa sa gobyerno alang sa mga senior citizen.

“All NGAs and instrumentalities, including GOCCs (government-owned or -controlled corporations), GFIs (government financial institutions) and SUCs (state universities and colleges) are hereby directed, and all LGUs are hereby encouraged, to extend full support for and cooperation with the NCSC in the conduct of relevant activities and programs for senior citizens during the annual celebration of the Elderly Filipino Week.”

Ang implementasyon sa memo pagapondohan sa kasamtangan ug magamit nga mga gahin sa mga hingtungdan nga ahensya, ubos sa pagbadyet, accounting, ug mga balaod sa pag-awdit, ingon man mga lagda ug regulasyon.

Gideklarar sa RA 11350 nga usa ka polisiya sa estado ang pagsuporta sa mga lakang sa pagpauswag sa kahimsog ug kaayohan sa mga senior citizen nga Pilipino, paghatag og mga serbisyo, programa ug mga kalihokan nga makaayo kanila, ug pagsiguro sa usa ka makasuporta ug makapaarang nga palibot alang sa mga tigulang.

Ang Proclamation No. 470 (s. 1994) mideklarar usab sa unang semana sa Oktubre sa matag tuig isip _Linggo ng Katandaang_ Filipino aron ipasiugda ang mahinungdanong tahas sa sektor sa mga tigulang sa pagtukod sa nasud ug sa pagpalambo sa ilang mga katungod ug kaayohan.

Ang Palasyo nagkanayon nga ang tinuig nga selebrasyon magmalampuson uban sa partisipasyon sa tanang national government agencies (NGAs) ug instrumentalities, lakip na ang GOCCs, GFIs, state universities and colleges ug LGUs. (ECB/PIA7-Bohol)