SYUDAD SANG ILOILO (PIA) -- Kontento sa karon si Presidente Ferdinand Marcos Jr. sa mga nahimo sang Philippine Army sa pagsakdag sang kalinong kag paghidaet batok sa presensya sang Communist Terrorist Groups sa Western Visayas, apang iya nga ginpaalintun nga kinahanglan ang ini nga mga grupo indi na makaangkon sang plataporma nga magasuporta sang ila nga operasyon.

“I would (like to) congratulate you for the good progress that you’re making. Keep the pressure going…I know that the other units are also doing it in terms of the financing. But perhaps, you could put more emphasis on that,” pahayag sang presidente sa ginhiwat nga situation briefing kaupod ang mga opisyal sang sang 3rd Infantry Division sa Camp General Macario Peralta Jr. sa banwa sang Jamindan, Capiz.

Suno sa mga reports nga ginpresenta ni Maj. Gen. Marion Sison nga commander sang 3ID sang Philippine Army, ginahimuslan sang ini nga armado nga grupo ang mga minority groups nga kalabanan sini amo ang mga indigenous peoples.

Kabahin ang 3rd Infantry Division sang Joint Task Force (JTF) Spear, kaupod ang 301st Infantry Brigade, 302nd Infantry Brigade, 303rd Infantry Brigade, kag Joint Task Group Cebu, kun sa diin nasakop sa ila nga operasyon amo ang  Western Visayas kag Central Visayas.

Ginalagas sa karon sang JTF Spear ang nabilin nga mga CTGs sa ila nga nasakop nga lugar kag nalakip man sini ang lima ka mga guerilla fronts (GFs).

Kaupod man sang JTF Spear ang nagkalain lain nga mga ahensya sang gobyerno nga nagtalana sang farm-to-market nga mga kalsada kag road concreting nga mga proyekto sa idalom sang Barangay Development Plan (BDP). (AAL/LMLE/PIA Iloilo/PND)