TAGBILARAN CITY, Bohol, October 16 (PIA) -- Gipresentar sa National Research Council of the Philippines (NRCP) ang resulta sa Ubay Science City Policy Research Project niadtong Oktubre 12 sa Panda Tea Garden sa syudad sa Tagbilaran.

Ang pagtuon gibase sa Filipino Science City Readiness and Achievement Framework, nga nag-assess sa mga domain nga naglakip sa societal foundation, governance, science, technology, and innovation (STI), ug trans-sectoral governance.

Kini usab comparative research tali sa Science City of Muñoz sa Nueva Ecija ug Los Baños, Laguna ug gipresentar ni Dr. Segundo Romero Jr., NRCP member.

Ang lungsod sa Ubay nakakuha og "very high" sa shock management, usa ka sub-domain sa ilawom sa pundasyon sa katilingban nga naghulagway sa kalig-on sa lungsod taliwala sa lainlaing mga hagit.

Ang lungsod nakapasar sa gikinahanglang teritoryo apan kinahanglang maabot ang gikinahanglang lokal nga kita nga P100 milyones base sa 1991 kanunay nga presyo nga nagkantidad ug P1.02 bilyones niadtong 2023.

Ang bid niini nahiuyon sa nasudnong estratehiya alang sa pagpasiugda sa siyensya ug teknolohiya base sa nasudnong mga palisiya.

Base sa Cities and Municipalities Competitiveness Index scores, ang Ubay nakakuha og 5.8 kumpara sa Los Baños nga adunay 5.3 sa imprastraktura ug gitabla sa Muñoz nga adunay 9.8 sa episyente sa gobyerno.

Ang Ubay nakakuha og 4.7, ang Muñoz adunay 5.2 puntos sa Comparative Dynamism, samtang ang Los Baños adunay 5.7 sa kategorya.

Sa  laing bahin, ang mga resulta nagrekomendar sa pagmugna og Science City Development Council aron sa paghimo sa usa ka Science and Technology (S&T) Investment Development Plan ug pag-establisar og multiversity system mechanism alang sa edukasyon samtang nag-inject sa S&T sa tanang local government unit (LGU) nga mga plano.

Gisugyot usab sa konseho ang pagpaaktibo sa usa ka Science City National Network alang sa lokal ug internasyonal nga mga institusyon ug pag-establisar og komunidad sa mga siyentipiko, nga magamit sa Ubay isip usa ka sulundon nga lokasyon alang sa pagretiro.

Kasamtangang gisang-at ni Second District Congresswoman Vanessa Aumentado sa 19th Congress, nagsugod ang bid sa Ubay sa dihang ang kanhi kongresista ug karon Gobernador Erico Aristotle Aumentado misumiter og House Bill niadtong 2017 aron himoong “Science City” ang lungsod, diin puy-anan sa daghang S&T nga sentro sa panukiduki.

Malaumon si Gobernador Aumentado nga mas daling matuman ang tinguha sa lungsod uban sa suporta sa kagamhanang probinsiyal ug pakigtambayayong sa LGU sa Ubay.

Sa iyang bahin, si Rep. Aumentado mipahayag og pasalamat sa NRCP sa paghimo sa paningkamot sa research study, ilabi na sa mga output nga gipresentar.

Ang kalihukan gitambungan sa mga opisyal ug miyembro gikan sa nasudnong ahensya, NRCP, PGBh, LGU-Ubay, ug people organizations. (ECB/PIA7-Bohol)