TAGBILARAN CITY, Bohol, October 9 (PIA) -- Dili lamang yano-yano nga mga bags, kon dili, dagway na usab og may class ilabi na kay gibitbit sa mga batan-ong models, atul sa Basura to Bags Fashion Show, September 27, didto sa sulod sa National Museum sa Bohol.
Kini aron ipalanug ang panawagan ngadto sa katawhan sa pag reuse, recycle ug upcycle sa mga basura aron kamenosan ang ilabay ngadto sa mga basurahan, nga kasagaran, dili dali malata ug makadaut pa sa kalikopan.
Gikan sa mga basura, lisud tuohan nga mamahimo kining high-end nga functional fashion bags nga may nagkadaiyang bulok, apan kini gayud maoy gidason sa 15 ka mga ramp models nga nagpakita sa unsay nga kahimo-an sa basura, ilabi na kon himoon usab nga fashion accessories.
Matud ni Tagbilaran City Tourism Officer May Hope Arcenal, ang paghimo sa labing una nga Fashion Show nga nagpakita sa Basura nga nahimo na nga mga bags ug fashion accessories, kini kabahin sa solusyon aron kakuhaan na ang paglabay ilabi na sa plastic nga kausa lamang gamiton, ang pag-pataas sa kantidad sa basura nga gilabay na unta ug ang pagtanyag og dugang kita sa katawhan.
Ang fashion Show nga didto himoa sulod sa National Museum Bohol courtyard, kabahin sa paghandum sa World Tourism Day ug sa pagtak-op sa Creative Industries Month sa Septembre.
Ang fashion show, dugang ni Arcenal, dili lamang nagpakita sa pagka mamugnaon nga talento sa mga Bol-anon apan usab sa pagpakat-on sa katawhan kon unsay mga pamaagi sa paggamit pag-usab, ug pagrecycle, tungod kay, matud pa, adunay Bahandi sa basura.
Gawas sa mga bags nga nahimo gikan sa mga basura ug nga nilabay na nga mga tarpaulins, nakapita usab ang mga head-dress nga ginama sa basura ug gipakita nga maayo diay usab gihapon, mga fashion accessories, isip subay sa mga mandatus sa Tagbilaran City Livelihood ang Community Development Unit.
Sa Fashion Show, gigamit usab ang mga tribal fashion accessories nga hinimo ni Marilyn Tutor.
Sa gipahigayon nga indigay sa kaanyag, sa pagrampa ug sa pagpakita sa kaanindot sa mga mga bags nga gikan sa basura, mingdaug ang modelo nga gikan sa Bohol Institute of Technology, ang gikan sa University of Bohol maoy second ug ang gikan sa Tagbilaran City Science High School, maoy ikatulo. (RAHC/PIA-7 Bohol)
