January 13, 2022 - Nagmalampuson ang “The Challenge Initiative (TCI) Program” sa implementasyon sa mga nagkada-iyang programa alang sa mga kabataan dinhi sa dakbayan sa Dipolog, ilabina dinha sa pagprotehir sa mga kababayen-ang nag-edad 10 hangtod 19 sa posilidad nga momabdos sa sayong edad kon “teen pregnancy”.
 
Kini ang nasayran human gibutyag, atol sa gipahigayon nga tigum pinaagi sa zoom, nga tungod sa mga aktibidades ug “interventions” nga gihimo sa TCI niadtong nakalabay nga tuig,  nalikay niini ang 118 ka batan-ong babaye sa posilidad nga mabiktima sa ”teenage pregnancy”.

Ang nasangpit nga kalamboan gikalipay ni Mayor Darel Dexter T. Uy kinsa mipadayag sa iyang kahimuot nga nagmalampuson ang kagamhanang lokal sa Dipolog uban sa mga “stakeholders” niini sa pagpanalipod sa kababayen-an dinhi sa dakbayan.
 
Nanghinaot ang batan-ong mayor nga magmabungahon ang tuig 2022 ug padayong  mo-us-os ang kaso sa COVID-19 virus aron makapadayon ang dakbayan sa mga maayong programa ilabina dinha sa mga “youth-oriented program” tungod kay ang Dipolog maoy usa  ka “adolescent-friendly city”.

Gipasalamatan usab niini ang Zuellig Family Foundation, PopCom ug ang tanang hingtungdan kinsa aktibong mipartisipar aron magmalampuson ang implementasyon sa mga programa niini.

Ang nahisgutan nga tigum sa TCI gisalmutan nila ni Mayor Darel Uy, CSWDO Arlene Jatico, Ms. Donnabelle Mutia sa City Health Office, Mickah Erickah Joy Celiz, M and E Expert sa TCI Philippines, Maria P. Ferrolino, City Technical Lead lakip na ang mga miyembro sa Sangguniang Kabataan Federation-Dipolog pinangulohan ni Hon. Mandel Zoe Lugasan ug mga personahe gikan sa PopCom, DepEd ug ZNFePa. Kini didto gipahigayon sa Museo Dipolog kagahapon, Enero 12 ning tuiga, sa may kapin kon kulang alas 2:00 ang takna sa hapon. (EDT/PIA9-Zamboanga del Norte/photos and details by CIO-Dipolog/cio-Ltd)