BORONGAN CITY -- Nagpapadayon it pagkarawat hin mga aplikante ha ilarom hit programa "Isang Propesyonal, Isang Pamilya" hit gobyerno-probinsyal han Eastern Samar
Ini an maupay nga notisya nga nahikay ha pakighimangraw kan Emmanuel Mannie A. Arago, focal person han nasabi nga programa, Huybes.
Sumala kan Arago, ha pagkayana, porlomenos 27 na nga mga aplikante, tikang hin tay-aw nga mga kabaranggayan an nakapagsubmiter han mga kaangayan nga dokumento ha opisina ni Gov. Ben Evardone .
Waray pa igintalaan nga petsa o deadline han aplikasyon ngan waray pag-iba an mga rekisitos ug aludaydayan pag-apply ha programa.
Otro gintagan hin duon ni Arago nga an kwalipikado nga aplikante dapat residente ha usa nga tay-aw nga barangay ha Eastern Samar; dapat economically-challenged o makuri an panginabuhi han pamilya; dapat waray pa bisan usa nga nakahuman ha kolehiyo nga anak han ira pamilya; ura-ura nga interesado makaiskuyla ngan makahuman han iya karuyag nga kurso; diri kinahanglan nga freshman college o masulod pala ha kolehiyo, bisan an nakasakob o naka iskuyla na ha kolehiyo nga magmamalaka gradwar nala; ngan
andam bumulig han iya pamilya kahuman umiskuyla ngan makapagtrabaho.
Para han kwalipikado nga mga Estehanon, puydi na tikangan an pagproseso han masunod nga mga dokumento: Certification tikang hit Punong Barangay hiton residensya ngan waray pa anak sakop hit pamilya nga grinadwar ha kolehiyo; Certificate of Indigency tikang ha MWSDO; ngan Photocopy han report card para han freshmen, Certificate of Grades han naglabay nga semester kon naiskuyla na ha kolehiyo.
Igindugang pa ni Arago, kon masulod pala ha kolehiyo (freshmen students), hira in maagi han regular nga proseso hit admissions - makuha hit university entrance examination.
Masubmiter hira hin Photocopy han registration form pagpamatuod nga hira in enrolled na ha bisan diin nga ESSU campus.
Maaro liwat hira hin Certification ha ESSU Office hit Scholarship and Financial Assistance, nagsusumat nga diri ka benepisyaryo hin iba la nga scholarship grants.
Lakip pa han igpapasa in duha nga 2x2 ID picture ngan usa nga valid ID (school ID).
Nahibaruan pa kan Arago nga diri applicable ini nga programa para hit mga naiskuyla o tiiskuyla gawas hit probinsya o ha mga pribado nga iskuylahan ma dinhi la o gawas hit E. Samar.
Eksklusibo ini ha ESSU nga programa, pulong pa niya.
Sakop hini nga programa in 35 nga mga barangay, tulo nga sitio, ngan 11 ELCAC barangays han probinsya.
Ini an mga masunod: Casidman, Inayawan (Arteche); Cagmanaba, San Roque (Jipapad); Bangon (San Policarpo);Trinidad, Sitio Maycorot, Japay (Oras); Dinigpi-an, San Roque (Dolores); Libertad, Taytay, Tangbo (Maslog); Salvation (Can-avid); Pangabutan (Taft); Kandalakit, Mabini, San Francisco (Sulat); Putong, Sitio Palo-uno (Sulat); San Mateo, Pinanag-an, San Andres, Can-aga (Borongan); Patag (Maydolong); Malvar (Balangkayan); Burak (Llorente); Cacatmonan (Hernani); Tandang Sora, Laurel (Gen.MacArthur); Sta.Cruz, Matarinao Sitio Malobago, Capanoypoyan (Salcedo); Busay (Mercedes); Timala, Mayana, Victory Island (Guiuan)' Mabini (Quinapondan); Roxas (Giporlos); Maybunga (Balanggiga); ug San Isidro (Lawaan).
Ini nga pauna nga lista in ginkuha tikang ha Provincial Poverty Alleviation Team (PPAT) han Provincial Government.
Segun kan Arago, puydi pa ini pahiluagon iton sakop.
Manunumduman, Mayo 24, 2022, han iglansad an mao nga programa ha Brgy. Cambilla, Quinapondan ha pangunguna ni Gov. Ben Evardone.
Panuyo hini nga makabulig nga magkamayda bisan na manla mausa nga anak hin kada pamilya in makahuman pag-iskuyla, makatrabaho para makabulig pagtalwas han kakurian han ira pamilya.
Samtang, an mga benepisyo han makakasulod han programa amo an masunod: libre an matrikula, ha ilarom hit Universal Access to Quality Tertiary Education (Republic Act 10931 of 2017); makarawat hin binulan nga allowance nga P3,000; para han nakuha hin kurso nga mayda board/licensure examinations, libre it gastos hit pag-review; ngan aasisteran nga makatrabaho para makabulig hit ira pamilya, pahayag ni Arago. (Pen Pomida/RP)
