OZAMIZ CITY, Misamis Occidental (PIA)—Sa unang higayon sa kasaysayan sa Ozamiz City nga gikan sa tanang 51 ka mga barangays sa dakbayan ang mga benepisyaryo nga nahatagan sa programa sa livestock dispersal (tulo ka manok o usa ka baktin alang sa matag benepisyaryo).

Kini programa nga gisugdan sa kanhi mayor sa dakbayan, Second District Rep. Sancho Fernando “Ando” Oaminal ug karon gipadayon ni Mayor Henry “Indy” Oaminal Jr.

Mukabat sa 80 ka mga benepisyaryo ang nakabenipisyo sa Asenso Ozamiz Sustainable Livelihood Assistance Program ug nahatagan sa mukabat 20 ka mga baktin ug 60 ka mga manok.

Ang matag benepisyaryo ang nahatagan usab sa duha ka kilos nga feeds alang sa nakadawat sa baktin ug usa kilo nga feeds sa nahatagan sa manok.

Gipangunahan ni Vice Mayor Simplicia Neri, sa ngalan ni Mayor Indy, ang livestock dispersal nga didto gipahigayon sa Kinuman Norte Mini Gymnasium, Hulyo 22.

Usa sa mga nasabutan taliwala sa LGU ug sa mga benepisyaryo mao nga kung manganak na ang baboy ug manok, muhatag lamang sa tulo ka manok balik sa LGU ug usa sa nahatagan sa baboy aron mahatag na usab kini sa uban pang mga beneficiaries. Ug kung magluya ang binuhing hayop, pahibaw-on lamang ang buhatan sa City Veterinary alang sa libreng medical attention ug tambal.

Human makita ang mga istorya sa kalampusan sa unang mga benepisyaryo pinaagi sa usa ka video presentation, nahagit gayod ang mga midawat karon nga mapadaghan ang ilang livestock aron mabalik ug mapadayon ang programa sa Asenso Ozamiz administration. (AONC/PIA-10/ MisOcc)