Hindi lamang isa, kundi limang Christmas Tree na may iba’t-ibang sukat at disenyo na sumisimbolo sa tunay na diwa ng Pasko at sa katangian ng bawat pamilyang Palawenyo ang pinailawan sa palibot ng Kapitolyo ng Palawan sa pangunguna ni Governor Victorino Dennis M. Socrates kamakailan.

Ang pagpapailaw nito ay hudyat ng pagbubukas ng Paskuhan sa Kapitolyo 2022 na may temang 'Pasko ng Pamilyang Palawenyo sa ika-400 taon ng Kristiyanismo sa Palawan, Papuri at Pasasalamat sa Poong Maykapal'.

Gawa naman sa walis ting-ting at tambo na nilagyan ng mga salakot at pailaw ang Tree of Unity (kanan-itaas). 

Pagkakaisa ng mamamayan, kapayapaan, pagkakaunawaan, at pagtutulungan ng lahat ang sinisimbolo nito gayundin ang paggalang sa pagkakaiba ng bawat isa.Tulad ng walis tingting at walis tambo na kapag pinag-isa at pinagsama-sama ay mas higit na nakapaglilinis, ganyan din ang pamilyang Palawenyo na may ispiritu ng ‘Bayanihan.’

Dahil naman sa matinding pinsala na idinulot ng bagyong Odette sa kalikasan ng Palawan noong nakalipas na taon, maraming punong kahoy ang nasira at naging driftwoods.

Ito ang pangunahing materyales na ginamit upang maitayo ang Tree of Life na nilagyan din ng ilang mga tanim at pailaw. Ipinapakita nito na pagkatapos masira ang mga punongkahoy ay muli itong sisibol at magkakaroon ng panibagong buhay at pag-asa na inihalintulad sa pananalig at katatagan ng pamilyang Palawenyo. (OCJ/PIA-MIMAROPA)