Matapos mailunsad ay opisyal nang ginagamit ng Pamahalaang Panlalawigan ng Palawan sa lahat ng dokumento ang bagong nitong ‘Official Seal’ sa bisa ng Provincial Ordinance No. 3109 series of 2022.

Sa isinagawang Arampangan sa Kapitolyo (Usapan sa Kapitolyo) kamakailan ay ipinakita at ipinaliwanag nina Gobernador Victorino Dennis M. Socrates at ng kanyang Chief-of-Staff na si Ceasar Sammy Magbanua kasama si Provincial Information Officer Atty. Christian Jay Cojamco kung bakit pinalitan ang dating selyo ng pamahalaang panlalawigan maging ang mga simbolo na makikita dito.

Makikita sa bagong selyo ang mga simbolo na kinabibilangan ng Isla ng Palawan, mga isla sa munisipyo ng Kalayaan, ang munisipyo ng Cagayancillo, ang Manunggul Jar na isa sa tinaguriang Cultural Treasure ng Pilipinas na natagpuan sa Tabon Cave sa Quezon, Palawan, at ang St. Augustine Church, ang pinakalumang simbahan sa lalawigan na matatagpuan sa bayan ng Cuyo.

Sa paliwanag ni Gob. Socrates, kinakailangan na talagang palitan, ang kasalukuyang selyo dahil ang central image na nakalagay dito ay ang underground river, at ang tandikan na hindi na bahagi ng lalawigan ng Palawan mula ng ito ay maging Highly Urbanized City (HUC) na at ito ang unang-unang konsiderasyon sa pagpapalit ng seyo.

Pangalawa, aniya ay ang napapanahon na pag-obserba ng 400 Taon ng Kristiyanismo sa Palawan. Ang St. Augustine Church sa Cuyo na dating Kota at iba pang Kota na matatagpuan sa mga munisipyo sa bahaging norte ng lalawigan ang nagsi-simbolo ng kristiyanismo at ang Manunggul Jar naman ang sumisimbolo sa Indigenous Religions.

“It’s very simple, halos isla lamang ng Palawan, sa itaas na bahagi ang Kota at sa ibaba naman ang Manunggul Jar, it connects the north and south of the Province, Ito ay may istorya at naglalahad ng ating pagka-Palawenyo, nagpapakita ito ng ating kasaysayan, ng ating kultura,” pahayag pa ni Gov. Socrates.

Sa ilalim naman ng selyo ay may nakalagay na 1902 kung saan nagsimula ang Pamahalaang Panlalawigan ng Palawan.

Ayon kay Chief-of-Staff Magbanua, kasama rin sa selyo ang Munisipyo ng Cagayancillo dahil sa Tubbataha Reefs Natural Park na isa sa UNESCO Heritage Site at ang Kalayan Island Group (KIG) sa West Philippine Sea (WPS) na sagop ng lalawigan at kasama sa pinag-aagawang mga isla ng iba pang mga bansa.

Sumulat na rin aniya sila sa National Historical Commission of the Philippines at sa Department of Interior and Local Government (DILG) upang ipaalam ang pagpapalit ng selyo ng pamahalaang panlalawigan

Sinabi naman ni PIO Atty. Cojamco na tnalagga napapanahon na ang pagpapalit ng selyo dahil sa pagkakatatag ng Puerto Princesa bilang Highly Urbanized City.

“Itong pagpapalit ng ating selyo ay isa rin sa ating paraan upang kilalanin ang klasipikasyon ng Lungsod ng Puerto Princesa bilang isang HUC. At isa rin ito sa pagpapakita ng ating respeto sa lungsod bilang ating co-equal local government unit,” pahayag ni Atty. Cojamco. (OCJ/PIA-MIMAROPA, Palawan)