LUNGSOD NG CALAPAN, Oriental Mindoro (PIA) – Mula Manila hanggang sa isang liblib na barangay ng mga katutubong Mangyan, sa tribo ng Alangan ay dumating ang isang pribadong grupo sa Tipas Elementary School sa Brgy. Magtibay Naujan upang maghatid ng mga babasahin sa paaralan, food packs at iba pa.

Inihatid ng personal ang mga nasabing bagay at gamit ni Atty. Caroline Cruz, Executive Director ng Pitmaster Foundation, isang non-government organization (NGO) na siyang nagiikot sa buong bansa upang bigyan ng mga kakulangang gamit ang ilang paaralan na malalayo sa kabihasnan lalo na sa mga tribo ng katutubo.

Sinabi ni Atty. Cruz kay Tipas Elementary School Head Teacher, Resurecion Taywan at sa mga bata, “kami ay natutuwa at narating namin ang inyong lugar para bigyan kayo ng mga flashcards,  mga aklat mula grade one hanggang grade six, diksiyonaryo, face mask, kahon ng noodles, toothpaste, sabon na pampaligo at salamin na pambasa.”

Tinanggap ng pitong katutubo at isang tagalog na guro ang mga gamit na siyang mapapakinabangan ng 130 mag-aaral na batang katutubo mula kinder hanggang ika-anim na baytang gayundin ang kanilang mga magulang.

Kasama din si National Commission on Indigenous Peoples (NCIP) Provincial Officer, Reynante Luna na siyang tumulong na maihatid ang mga gamit at para ipaalam ang ibang mga proyektong nakalaan sa mga katutubo sa lalawigan.

Samantala, nakatakdang magbigay ng isang bagong ambulansiya ang nasabing NGO sa pamahalaang panlalawigan upang ipagkaloob sa mga tribong nasa malalayong lugar na siyang makakatulong upang mabilis na madala sa mga pampublikong ospital ang mga katutubong may malalang karamdaman. (DPCN/PIA - Oriental Mindoro)