LUNGSOD NG CALAPAN. Oriental Mindoro (PIA) -- Inilunsad ng Technical Education and Skills Development Authority (TESDA) ang Project SAGIP o 'Sustainable Agri-based Livelihood Program' sa Villa Cerveza Elementary School sa bayan ng Victoria para sa pagsasanay ng nasa 100 residente na Barangay Villa Cerveza.

Ang tanggapan ng TESDA ang nanguna sa nasabing programa sa pamumuno ni TESDA Regional Director (RD) Engr. Manuel Wong at Provincial Director (PD) Joel Pilotin upang ipagkaloob ang mga kursong mapapakinabangan ng mga residente para tulong pangkabuhayan.

Matapos ang programa ay lumagda ang mga kinatawan ng pamahalaan sa isang Pledge of Commitment nila sa Project SAGIP.

Ang naturang barangay ay kabilang sa prayoridad ng National Task Force to End Local Communist Armed Conflict (NTF-ELCAC) na dapat pagtuunan ng pansin sa ilalim ng Poverty Reduction, Livelihood and Employment Cluster (PRLEC) na sumusuporta sa Executive Order No. 70 ni Pangulong Rodrigo Roa Duterte (Institutionalizing the Whole of Nation Approach in attaining inclusive and Sustainable Peace).

Dumalo din sa nasabing aktibidad si Mayor Joselito Malabanan, mga kinatawan mula sa tanggapan ni Gov. Bonz Dolor, Department of Science and Technology (DOST), Department of Agrarian Reform (DAR), Department of Labor and Employment (DOLE), Cooperative Development Authority (CDA) at Provincial Agricultural Office (PAgO) na nangakong susuporta sa nasabing programa ng mga ahensiya ng pamahalaan para sa ikauunlad ng mamamayan. (DPCN/PIA-Oriental Mindoro)