TAGBILARAN CITY, Bohol, July 8 (PIA) -- Nagpahigayon ang lungsod sa Jagna ug pagpanghatag sa titulo sa ilang mga yuta ngadto sa 50 ka beneficiaries pinaagi sa ilang programa nga Handog Titulo subay sa nasudnong programa nga gipatuman sa Department of Environment and Natural Resources (DENR).
Kini nga kalihukan gisugdan sa usa ka hapsay ug mubo nga programa nga gipasiugdahan sa hepe sa Provincial Environment and Natural Resources Office, Ariel Rica.
Mitambong usab ang mga kawani sa Munisipyo nga gipangulohan ni Municipal Administrator Teresa Gina Ranan isip representante ni Mayor Joseph Rañola.
Mapasalamaton kaayo ang mga beneficiary sa maong kalihukan labi na sa PENRO ug DENR nga mao ang ni proseso aron matitulohan ang ilang mga kayutaan.
Kadto lamang mga makapamatuod nga nagtikad ug nagpuyo sa yuta nga ilang giyak-an sulod sa 20 ka tuig labing menos, ug kadtong may titulo na apan misipak og luna gikan niini ang kahatagan sa titulo sa programa sa goberno, aron ikapasaka ang bili sa propiedad, ipaseguro ang pagpanag-iya sa mga nagtikad sa yuta alang sa dugang produksyon sa pagkaon ug opisyal ga pag-angkon sa luna, ang kahatagan sa titulo.
Mapasalamaton usab sila ug dako ni Mayor Joseph Rañola nga mipagahin og pundo aron makapaproseso sa titulo ug niini, nadawat na nila ang ilang gi-ampo nga titulo aron opisyal na ang ilang pag-angkon sa yuta nga ilang gitikad ug gipuy-an sa dugay nang katuigan. (RAHC/PIA7 Bohol/John Paul Elicano)
