LUNGSOD NG CALAPAN, Oriental Mindoro (PIA) -- Inilunsad ng Department of Agrarian Reform (DAR) sa lungsod na ito ang proyektong ‘Buhay sa Gulay’ kung saan magtatanim ang nasa 25 kasapi ng 4Ps ng iba’t-ibang uri ng gulay sa isang lote na halos kalahating ektaryang ang lawak sa site ng proyekto sa Brgy. Lalud kamakailan.

Sa mensahe ni Provincial Agrarian Reform Program Officer (PARPO II), Engr. Isagani G. Placido, “ang proyekto ay gagawin sa halos 5,000 metro kuwadradong lupain na pagmamay-ari ng Apostolic Vicariate of Calapan (AVC) at may potensiyal pang mapalawig hanggang 4,000 metro kuwadrado. Ang lugar na ito ay inabandona na at dating tinataniman ng mga katutubong Mangyan ng mga gulay sa tulong ng Diocesan Social Action Center ng AVC.”

Sa nasabing pagsasanay, makakatanggap din ang mga partisipante ng allowance at starter kit mula sa TESDA.

Ang nasabing lugar ay tataniman ng 10 iba’t-ibang uri ng gulay tulad ng kamatis, okra, talong, pechay at iba pa, habang ang tanggapan ng agrikultura ng lungsod ay handang magkaloob ng mga buto ng rambutan at lansones.

Matapos ang nasabing paglunsad, ipinagkaloob naman ng DAR sa mga tinukoy na kooperatiba ng magsasaka sa lalawigan ang isang Isuzu Elf mini truck, anim na motorcycle trailer, na siyang magagamit sa paghatid sa mga pamilihang bayan o merkado, at pitong hand tractor, at ginanap ang seremonyal na pagtatanim.