PUERTO PRINCESA, Palawan, (PIA) -- Isinagawa ang Barangay Health Economic Recovery Officer-Government Internship Program (HERO-GIP) online orientation noong Hulyo 12 sa lungsod ng Puerto Princesa. 

Sa oryentasyon, ipinaliwanag ni Armando Golifardo Jr, DOLE-Local  Healthy Economic Recovery Officer (Local HERO) for Puerto Princesa City na marami ang nawalan ng trabaho at nagsarang negosyo dahil sa Coronavirus Disease 2019 pandemic kaya  gumawa ng hakbang ang pamahalaan  sa pamamagitan ng National Employment Recovery Strategy 2021-2022 na binubuo ng ibat-ibang ahensya ng pamahalaan, employer sector, labor groups at civili society sa pangunguna ng Department of Trade and Industry (DTI) bilang Chairman at Department of Labor and Employment (DOLE) at Technical Education and Skills Development Aunthority (TESDA) bilang mga Co-Chairman.

Dahil dito, iminungkahi  aniya sa DOLE ng Balikatan sa Kaunlaran National Foundation Inc, isang Non-Government Organization (NGO) ang pagkakaroon ng mga community-based livelihood programs na nagresulta naman sa pagkabuo ng programang MISSION RACE (Rebooting Activities through Community Engagement), katuwang ang mga local Public Employment Office (PESO).

"Ang MISSION RACE ay may dalawang layunin: una ang profiling of labor market situation at makapagbigay ng livelihood and training opportunities," ayon pa kay Golifardo.

Para ito ay magawa, ang magiging trabaho at resposibilidad ng bawat HERO-GIP sa mga barangay ay magsagawa ng survey kung sino-sino ang nawalan ng trabaho, at  ano-anong mga establisyemento ang nagsara.

Sa pagtatapos naman ng taon, gagawa  sila ng  mga rekomendasyon kung ano ang mga kailangan gawin ng pamahalaan para matulungan ang komunidad batay sa nakuha nilang  datos.

Kabilang rin sa mga dumalo sa oryentasyon ay ang mga barangay officials, mga kinatawan mula sa DOLE Mimaropa, tanggapan ng Punong Lunsod, City PESO at PIA-Palawan. (MCE/Mimaropa)