BOAC, Marinduque (PIA) -- Isang kasunduan ang nilagdaan ng National Nutrition Council (NNC)-Mimaropa at ng Bahi Agriculture and Fisheries Association (BAFA) para sa Tutok Kainan dietary supplementation program na naganap sa Provincial Office ng Department of Agrarian Reform (DAR) kamakailan.

Ang programang Tutok Kainan ay bahagi ng Philippine Plan of Action for National Nutrition Supplementation Program 2017-2022.

Layon nito na maiwasan ang malnutrisyon sa pamamagitan ng pagpapahusay sa kalidad at dami ng paggamit ng pagkain para sa mga 'nutritionally at-risk' na mga buntis at mga bata na may edad na anim na buwan hanggang dalawang taong gulang.

Bukod dito, napili ang BAFA bilang supplier ng mga pagkain na ibibigay sa mapipiling benepisyaryo.