PUERTO PRINCESA, Palawan, (PIA) -- Nabakunahan na para sa 1^st dose ng Aztrazeneca vaccines ang karamihan sa mga lokal na mamamahayag na nakatira sa lungsod ng Puerto Princesa.

Kabilang kasi  ang mga mamamahayag sa nabakunahan  sa unang araw ng vaccination roll-out noong Hulyo 27, para sa kabilang sa mga A4 priority group.

Ayon kay Alyansa ng Mamamahayag sa Palawan Inc. (APAMAI) Preident Ka-Damian Lacasa Jr ng Radyo Pilipinas-Palawan, napakahalaga nito para magkaroon ng proteksyon laban sa Coronavirus Disease 2019 (COVID-19).

“Napakahalaga ng vaccination para sa hanay nating mga mamamahayag lalo pa’t sinasabi ng ating Pangulong Rodrigo Duterte na vaccination is the answer to have protection at  tayo ay magiging empowered kung tayo ay vaccinated," ani Lacasa.

Iginiit niya pa na dapat  ay ginagawa rin ng isang mamamahayag kung ano man ang kaniyang ipinapahayag sa radyo, telebisyon at iba pang media platform lalo na kung patungkol sa vaccination program kaya mahalaga na mabakunahan rin ang mga media practitioner.

Nagpahayag rin ng pagsuporta si Lacasa sa vaccination program ng pamahalaan at hinikayat ang mga hindi pa nababakunahan na magpabakunan na.  Dagdag pa niya, normal lang ang kaniyang naging pakiramdam matapos mabakunahan.

Samantala, kinumpirma naman ni Normalyn Dave ng City Information office na nasa 80 local media ang nagpalista para mabakunahan.Naisagawa ang pagpapabakuna ng mga lokal na mamamahayag sa tulong ng pamahalaang panglungsod ng Puerto Princesa.  (MCE/PIA Mimaropa)