PUERTO PRINCESA, Palawan, (PIA) -- Isinisi ng City-Environment and Natural Resources Office (City-ENRO) sa iresponsable at malupit na  pangingisda ang pagkamatay ng isang sea cow o Dugong na nakita ng mangingisdang si Romeo Buenavista malapit sa pier ng Puerto Princesa City kamakailan.

Sa press statement na ipinadala ng City-ENRO sa PIA-Palawan, nakasaad na nakaka-alarma at nakakagulat na isang fishing speargun o pana ang pumatay sa isang “herbivore mammal” dahil sa ginawang pagsusuri ay nakita na mayroon itong sugat malapit sa kaniyang ulo at tiyan na naging sanhi ng kaniyang kamatayan mula sa isang lokal na mangingisda.

Sa ulat ni Bantay Dagat section head Luisito Garcia kay City-ENR Officer Atty. Carlo B. Gomez, ang nakitang patay na Dugong ay tumitimbang ng  70 kilo na may habang  67 pulgada at 17 pulgadang lapad.

Hindi ito ang unang beses na may nakitang patay na Dugong sa siyudad dahil ayon kay Administrative Aide II Kate Aeriel Gaite ng City ENRO Enforcement Division Bantay Dagat section, noong nakaraang taon ay may nakitang patay rin na Dugong sa baybaying-dagat ng Barangay Tanabag na may tama rin ng pana at nitong buwan lamang ng Pebrero ngayong taon, isang patay na Dugong na may tama rin ng pana ang nakita malapit sa Navy station sa  Barangay Bagong Silang.

Ayon sa City-ENRO, makakatulong ang mga mamamayan para maprotektahan ang mga Dugong sa pamamagitan ng dahan-dahang paglalayag para maiwasang mabangga ang mga ito na kadalasan ay makikita sa ibabaw ng dagat para makahigop ng sariwang hangin.

Samantala, bago inilibing sa Endangered Species Cemetery sa  Barangay Sta Lucia, ay nakipag-ugnayan muna ang City-ENRO sa tanggapan ng Palawan Council for Sustainable Development (PCSD) para sa kaukulang dokumentasyon.

Matatandaang ang paghuli o pagpatay sa mga buhay-ilang tulad ng Dugong o Seacow ay mahigpit na ipinagbabawal sa Republic Act 9147 o ang “Wildlife Resources Conservation and Protection Act” kung saan maaaring magmulta at makulong ang mapapatunayang nagkasala. (MCE/PIA MIMAROPA)