TAGBILARAN CITY, Bohol, Feb. 14 (PIA) -- Gipahinumdoman sa Department of Health (DOH) ang mga lokal nga kagamhanan sa pagsunod sa polisiya sa Inter Agency Task Force (IATF) kalabot sa pagpasulod sa mga dili pa bakunadong langyaw.

Gihimo sa departamento ang pahinumdom human nitugot ang pangagamhanang probinsyal sa Cebu nga dawaton  ang mga ‘unvaccinated foreign travelers’ sugod sa Marso 1.

Matud pa ni DOH Spokesperson Ma. Rosario Vergeire, angay gikonsulta una sa pangagamhanang probinsyal ang IATF sa wala pa nagpagawas og polisiya.

“Let me just remind all local government ‘yung mga binabalangkas na mga panukala o protocols ng IATF, ito ay isang mandato sa bawat isa sa LGUs na sumunod dahil kailangan yung protocols natin ipatutupad nationally so we can continuously protect our borders and we can prevent the further transmission of disease,” pahayag pa ni Vergeire.

Ako lang pahinumduman ang tanan nga mga Local Government Units nga ang mga gihan-ay nga mga lakang ug protocols sa IATF, nahimo na nga mandu ngadto sa tanan nga LGUs nga ilang sundon tungod kay gikinahanglan ang mga protocols nga ipatuman sa tibuok nasud aron mapadayon nato ang pagpanalipod sa atong mga utlanan ug atong kapugngan ang dugang nga pagkatag -takod sa sakit.  

Sa gipagawas nga direktiba ni Cebu Gob. Gwendolyn Garcia, kinahanglan lamang nga may negative swab test result nga nigawas sa milabay nga 48 oras ang byaherong langyaw bisan unvaccinated o partially vaccinated kini.

Ipaubos sila og balik sa swab test sa Mactan-Cebu International Airport ug ipaubos sa facility-based quarantine sa dili pa e-swab test og balik sa ika-limang adlaw.

Samtang si DILG Spokesperson Jonathan Malaya namahayag nga ilang estoryahon si Gob. Garcia kalabot sa direktiba niini. (ECB/PIA7 Bohol)