LUNGSOD NG BUTUAN -- Mahigpit man ang health protocols na ipinatutupad dahil sa coronavirus disease-2019 (COVID-19) pandemic, hindi pa rin pinalampas ng iba’t-ibang sektor ang pagkakataong makapag-donate ng dugo para makatulong sa mga may sakit at nagpapagaling sa mga ospital.

Sa pangunguna ng Philippine Red Cross (PRC) Agusan del Norte-Butuan City Chapter, naging makabuluhan ang pagtitipon ng iba't-ibang sektor sa bloodletting activity kung saan umabot sa 185 katao ang nakapag-donate ng dugo.

Kabilang si Rex Macadangdang sa mga kabataang aktibong sumama sa masayang bloodletting activity dahil sinamahan pa ito ng mga entertainment performances.

"Malaking tulong nito sa pagtiyak na mayroon tayong sapat na suplay ng dugo sa Red Cross at hindi na pahirapan para sa mga nangangailangan. Maganda rin ang naidudulot nito sa ating katawan,” ani ni Macadangdang.

Binigyang-diin din ni Israel Palero, station manager ng dxMB-95.1 Love Radio Butuan na bagamat may pandemya, hindi pa rin nawala sa mga Butuanon ang pagmamalasakit sa kapwa at agad itong tumugon sa panawagan ng Red Cross ng sapat na suplay ng dugo.

Ayon kay Christopher Joy Ampoon, blood bank in-charge ng Philippine Red Cross sa lungsod, pangatlong taon na nila itong isinasagawa.

“Tayo ay nagpapasalamat sa lahat ng nag-donate ng kanilang dugo para makatulong sa kapwa at makasagip ng buhay. Sana ay maging regular na ito sa atin na may mag-dodonate ng dugo para sa mga nangangailangan,” pahayag ni Ampoon. 

Lahat naman ng nag-donate ng kanilang dugo ay tumanggap ng souvenir at certificate mula sa organizer. (JPG/PIA-Caraga)