TAGBILARAN CITY, Bohol, Feb. 21 (PIA) -- Makahimo na ang University of the Philippines-Philippine Genome Center sa Visayas, sa paghimo og genome sequencing aron matrumbok ang variant sa mga sakit nga nakaapekto sa tibuok Kabisay-an ug Mindanao.

Kini human malampuson nga nakalabang ang UP PGC Visayas nga anaa mahimutang sa IloIlo City, sa inisyal niini nga pagpadagan sa 94 ka samples sa virus nga nakolekta sa Western Visayas.

Ang kalampusan sa UP PGC Visayas magkubos sa mga trabahoon nga adto kaniadto himoon sa mga genome sequencing centers sa kaulohan.

Kini samtang ang Department of Health (DOH), University of the Philippines - Philippine Genome Center (UP-PGC), u gang University of the Philippines - National Institutes of Health (UP-NIH) usab mitaho nga sa ilang nadawat nga 744 ka samples alang sa genome sequencing, 702 niini mapamatud-an nga mga kaso sa Omicron o B.1.1.529 variant o 94.35% sa tanang samples nga napadala ug may lain pa nga 9 ka Delta (B.1.617.2) variant cases (1.21%).

Kini nga pagkadiskobre, dala sa genome sequencing nga gihimo niadtong Enero 30, 2022.  

Human sa usa ka semana, lain nga 936 sa samples alang sa sequencing run nga gipadagan sa UP-PGC Diliman, UP-PGC Visayas, ug sa Research Institute for Tropical Medicine (RITM) niadtong Pebrero 6, 2022, napamatud-an nga ang 867 niining mga samples nga gipadagan, Omicron variant o 92.63% u gang 7 ka kaso o (0.75%) Delta variant cases.

Niini, mikabat na sa 1,569 na ka kaso sa Omicron variant ang namatikdan, 1,458 niini mga local cases, samtang 76 ang sa Returning Overseas Filipinos (ROFs), ug 35 ka kaso ang kasamtangan pang gisuta ang ilang mga addresses.

Sa dugang nga taho, 72 sa mga kaso aktibo pa, 4 na ang namatay, 1,403 ka kaso ang na-ayo na o naulian na samtang may 90 ka kaso ang gisubay pa karon kon naunsa na ang gidangatan.

Sa kinatibuk-an, sukad mamatikdi ang Omicron variant, 9 na ang kompirmadong namatay.

Sa mga kaso, 499 ang may kompleto na nga bakuna, 11 ang may us aka tupokan pa lamang, 15 ang wala gyud mabakunahi, samtang ang 2,197 ka kaso, wala pa matino ang ilang vaccination status.

Sa laing bahin, dugang 16 ka Delta variant cases ang namatikdan nga local ang origins, duha  ka kaso ang aktibo pa karon samtang ang 14, naayo na.

Mikabat na sa kinatibuk-ang 8,663 ang kompirmadong kaso sa Delta.

Kauban niining mga kasoha ang 628 nga gikataho nga mga bakunado na, 230 niini adunay partial pa lamang nga pamakuna, 536 ang wala gyud mabakunahi ug 7,269 ang wala pa matino ang ilang mga vaccination status.

Samtang ang DOH nagpabilin nga way puas ang pagtabang sa nasud pagpakigbugno sa pandaemya nga dala sa, ug samtang hinayhinay nang nagkaubos ang kaso, nagpahinuomdo ang ahensya sa pagpadayon sa pagtuman sa minimum public health standards  ug pagpadaghan pa sa pagpabakuna aron mas malig-on pa ang panalipod sa komunidad batok sa sakit.

Kona to lang kining hiusahan ug tabangan, mahomo kini nato nga hingpit na nga sumpoon aron makabalik na kita sa pagpakabuhi sa bag-ong normal, matud sa DOH. (RAHC/PIA7 Bohol)