TAGBILARAN CITY, Bohol, Feb. 28 (PIA) -- Hangtud makaabut sa 80% nga vaccination rate sa senior citizens ug sa mga may daan na nga sakit, kini maoy usa ka basehan nga ipakanaug na ang Alert Level 1 sa coronavirus disease (COVID-19).

Kini maoy unod sa gipadayan ni Health secretary Francisco Duque ngadto sa Presidente, diin, matud niya, ang 80% nga makab-ot nga pamakuna sa eligible population sa usa ka lugar mao usab ang gilantaw sa Inter-Agency Task Force for the Management of Infectious Diseases (IATF) sa paghukom kon unsa nga alert level ang ipakayab sa nga ngakadaiyang lugar sa nasud.

Gitataw sa kalihim nga kon ang us aka lugar wala pa makaabut sa 80% ang iyang pamakuna sa mga gihatagan sa prayoridad nga mabakunahan, dili usab pa pwede nga ikanaug ang Alert Level ngadto sa Level 1.

Matud ni Duque, ang dugang nga basehan sa pagtimbang kon diin ug hain nga mga lugar ang hinog na nga ipailawom sa Alert Level 1, maayo nga namugna samtang mikabat na sa 134,332,014 ka doses sa bakuna ang natupok na, taman niadtong Pebrero 21.

Niini, mikabat na sa 61,898,823 ang nagamit isip using tupokan, 62,652,101 isip ikaduhang tupokan ug 9,781,090 isip booster shots.

Apan sa kasayuran hikan sa Department of Health Covid-19 Vaccination Dashboard niadtong Pebrero 9, napakita nga sa mga senior citizens population, anaa pa sa 5,099,909 ang nakadawat sa ilang pasiunang tupokan, 6,253,846 ang nakakompleto na sa duha ka doses ug 1,580,226 ang nakakuha na sa ilang bosster shots.

Sa mga may gihambin na nga daan nga sakit ug delikado sa dali nga pagtakod sa COVID-19, mikabat na sa 7,820,800 ka individuals nga may comorbidity ang nakakuha sa unang tupokan, samtang anaa sa 9,006,721 ang nakakuha sa kopleto nga panalipod batok sa COVID-19.

Miabut na usab sa 1,688,505 ang mga may commorbidities ang nahatagan na sa booster shots. (RAHC/PIA7 Bohol)