CEBU CITY, Cebu, March 3 (PIA) -- Ang National Economic Development Authority Region 7 (NEDA-7) padayong nilihok sa ilang mandato pagtabang sa hapsay nga pag implementar sa Mandanas-Garcia Ruling nga gipagawas sa Supreme Court.

Bisan pa man nga ang nag-unang mga ahensya nga gitahasan niini mao ang Department of Interior and Local Government (DILG) ug ang Department of Budget and Management (DBM).

Matod sa NEDA-7, nagpadayun ang mga information drive nga ilang ginabuhat aron mahatagan og saktong mga impormasyon ang mga nagkalain-laing local government units (LGUs) dinhi sa Central Visayas, kabahin niining mga kabag-uhan nga ilang masinati sa ilang mga bulohaton isip usa ka lokal nga kagamhanan nga moserbisyo ngadto sa katawhan.

Sa DYRC radio program niadtong Marso 2, si Maria Teresa Alambra, chief of information and planning division sa NEDA-7, mipadayag sa ka importante sa mga information drive nga mao ang kinahanglan sa mga LGUs ilabi na nga karon modako ang ilang share sa budget allocation isip mando sa Mandanas-Garcia Ruling.

“Kay dili kaayo sakto ang information nga niabot sa mga hingtungdan, kinahanglan gyud ta og mga information drive pagpahibalo sa mga LGUs kung unsay ilang mga responsibilidad kay sila na baya ani ang mosawo sa mga proyekto nga ihatag sa mga national government agencies isip resulta aning Mandanas-Garcia ruling,” si Alambra miingon.

Ubos sa Mandanas-Garcia Ruling, ang mga national government agencies (NGAs) igo nalang mopahimangno og motambag kay ang kadaghanan sa mga proyekto og programa nga kaniadto nga ilang gikuptan ibalhin na kini ngadto sa mga LGUs.

Ang nga NGAs lakip ang NEDA, mamahimung mohatag og rekomendasyon kabahin sa mga proyekto ug programa nga angayan ipatuman sa mga LGUs karon nga madungagan ang ilang pondo.

Magsilbi usab giya ang NEDA ngadto sa mga LGUs sa pagdesisyon ug pagplano niini sa mga serbiyo nga pagahimuon alang sa pagpalambo sa ilang syudad o munisipyo.

Karon nga naghinay-hinay na ang pagimplementar sa maong kamanduan, ang chief of formation and planning division sa NEDA-7 midasig sa tanan nga magtinabangay alang sa malampuson nga pagpatuman sa Mandanas-Garcia Ruling.

“Atong giawhag atong mga LGUs nga ato nang sugod nga iimplement ang kani nga balaod nga kita na ang mohatag og mga serbisyo sa katawhan ug sa katawhan usab hinaot motabang ta sa atong mga LGUs nga maayo untang ma implement ang Mandanas-Garcia ruling,” batbat ni Alambra. (RGC/PIA7)