TAGBILARAN CITY, Bohol, March 17 (PIA) -- Nanumpa ang mga bag-ong napili'ng opisyal sa Association of United Development Information Officers (AUDIO) Bohol sa ilang katungdanan niadtong Marso 11, 2022 sa munisipalidad sa San Miguel, Bohol.
Si Ma. Lydia Bantugan, information officer sa Department of Agrarian Reform ang napili og balik isip presidente.
Isip status quo president, tumong ni Bantugan nga ipadayon ang mga wala natiwas ug walay kahumanan nga trabaho sa developmental information sa iyang pagdumala sa lain na usab nga termmino isip presidente sa AUDIO-Bohol, usa ka hiniusang bahan sa mga information officers sa kalungsoran kun local government units (LGUs) ug mga ahensya sa kagamhanan kun national government agencies (NGAs) nga nagtambayayong sa pagpakatap sa mga kasayoran ngadto sa katawhan sa mga kalungsoran.
Ang mga bag-ong opisyal nanumpa sa atubangan ni Atty. Glenn Damasing, ang Municipal Administrator sa lungsod sa San Miguel.
Apil sa nanumpa sila Doris Isabel Racho sa Agricultural Training Institute 7 isip Vice President for NGAs; John Larry Evangelista sa LGU-Ubay isip Vice President for LGUs; Imee Raut sa LGU-Lila isip Secretary; Elvie Bongosia sa Philippine Information Agency isip Assistant Secretary; Rosario Chatto sa Bureau of Internal Revenue isip Treasurer; Emilou Gonzaga sa National Commission on Indigenous People isip Assistant Treasurer; ug Herbert Torreon sa LGU-Getafe isip Auditor.
Si Vinesse Shalome Molina sa DENR isip Press Relations Officer sa First District; Rojer Lindo sa LGU-Tubigon isip alternate PRO sa 1st District; Manuelito Item sa LGU-Bien Unido isip 2nd District Press Relations Officer; ug Julius Golosino sa LGU-Alicia isip 3rd District Press Relations Officer.
Ang LGU-San Miguel sa pagpanguna ni Mayor Virgilio Mendez ang host sa Marso 11 nga AUDIO-Bohol meeting ug ‘Bisita Opisina’ nga gipahigayon sa Legislative Building sa maong lungsod.
Si Mayor Mendez, kanhi director sa National Bureau of Investigation (NBI) sa iyang welcome message nipahinumdom sa mga information officers sa ilang kritikal nga papel taliwala sa pagkatap sa fake news, disinformation ug misinformation ning panahon sa nagsingabot nga national elections.
Samtang ang kanhi NBI agent ug karon ang Municipal Administrator sa LGU-San Miguel, Atty. Glen Damasing, nipahinumdom usab sa mga information officers nga isip public servants likayan nga mahimong “onion skinned” sa posibilidad sa mga pag-atake og pagsaway ilabi na sa pakigbatok sa fake news, disinformation ug misinformation. (ECB/PIA7 Bohol)
