TAGBILARAN CITY, Bohol, March 21 (PIA) — Unsa pa ka layo ang Bohol para makaabut sa ikaduha nga sumbanan aron ikapa-ubos na ang COVID-19 Alert Level niini?

Kinahanglan pa nga makapamakuna sa 102,278 ka tawo aron makab-ot na ang gikinahanglang kadaghaonon sa mga Bol-anon aron makabaton na kini sa herd immunity.

Napaubos na man ang kadaghanon sa aktibong kaso sa Bohol ug napakita ang halos labing maayong talaan sukad miatake ang COVID-19 dinhi, medyo may uban pang gipangayo ang Inter Agency Task Force (IATF) aron ikapanaug na ang Alert Level gikan sa Level 2 ngadto sa Alert level 1 o Zero ba kaha hinuon.

Sa labing bag-o nga taho ni Gob. Arthur Yap ngadto sa Bohol Inter Agency Task Force on the Management of Emerging Infectious Disease (BIATF), nakab-ot na sa Bohol ang 60.75% vaccination coverage sa 1,106,084 ka Bol-anon nga gitumbok nga maoy 80% sa kinatibu-ag populasyon nga angay mabakunahan aron makab-ot na ang herd immunity.

Sa 671,970 ka mga Bol-anon nga nakakuha na sa duha ka tupokan aron isipon nga fully vaccinated, may nahibilin pa nga 102,278 aron makompleto ang 80% nga eligible population subay sa master list nga gihimo sa mga tinugyanan sa kasanihan.

Gitaho usab sa Gobernador nga may 670,680 na usab ka tawo an gang nakakuha sa unang tupokan sa bakuna nga maghatag sa lawas sa panalipod batok sa COVID-19.

Gawas pa niini, gidugang sa gobernador nga may 69,500 na nga Bol-anon nga nakadawat na sa booster dose, nga matud pa ni DOH Secretary Francisco Duque III, makatabang pag-ayo sa pagpabiling may igo nga panalipod ang lawas human makakuha sa ikaduhang tupokan.

Gawas sa pagkab-ot sa pamakuna sa laing usa ka gatus ka libo ka mga Bol-anon, gikinahanglan usab nga makit-an sa IATF nga nakuha na sa us aka lugar ang pamakuna sa 80% sa ilang mga senior citizens.

Kini pagseuro nga kapanalipdan ang mga may edad na nga kasagaran mapilde gyud sa bugno sa COVID-19, segun sa kasinati-an sa ubang mga nasud nga una na nga nakaipsot na unta sa hulga sa COVID-19.

Dugang pa niini, kinahangalng hingkit-an sa IATF nga ming-ubos na sa 50% ang paggamit sa mga katre sa mga ospital, nga timailhan nga kontrolado na ang sakit. (RAHC/PIA7 Bohol)