TAGBILARAN CITY, Bohol, March 17 (PIA) -- Gihipno na sa Department of Budget and Management (DBM) ang guidelines alang sa himuong pangapud-apod sa P200 matag buwan nga ayuda sa mga kabus nga pamilyang Filipino.

Matud pa ni acting presidential spokesman Martin Andanar, ang Department of Social Welfare and Development (DSWD) ug  ang local government units ang magdumala sa pagapud-apod sa maong ayuda.

Si Andanar nagkanayon nga may listahan ang DSWD ug kini ang masterlist nga gigamit usab sa Social Amelioration Program (SAP).

Gibanabanang 12 milyong pamilya nga adunay katumbas nga 70 milyong indibidwal ang mahatagan niining bag-ong ayuda.

Niadtong Miyerkoles, Marso 16, gi-aprubahan ni Presidente Rodrigo Roa Duterte ang bagong ayuda base sa rekomendasyon sa Department of Finance (DOF) isip hulip sa pagsuspenso sa fuel excise taxes.

Giduso sa DOF ang dugang nga P200 sa gidawat karon sa mga kabus nga pamilya sa nasod nga mga benepisyaryo sa Pantawid Pamilyang Pilipino Program (4Ps).

Sa Talk to the People niadtong Marso 16, gi-presinta ni DOF Kalihim Carlos Dominguez III sa Presidente ang rekomendasyon isip hulip sa giduso sa ubang sektor nga suspensohon ang excise tax sa mga produktong petrolyo.

Gipasabot ni Dominguez nga madugangan pa ang makolekta sa gobyerno kun dili suspensohon ang excise tax ug ang madugang sa pondo mahimong ihatag sa mga kabus nga pamilya nga naa ubos sa 4Ps.

Matud pa sa Kalihim nga kun hatagan og dugang tabang nga P200 matag pamilya sulod sa usa  ka tuig, mokabat sa P33.1 bilyon ang pondu'ng igahin.

Gi-angkon ni Dominguez nga dili igo ang maong kantidad apan kini lang sa pagkakaron matud pa ang mahimong itabang sa gobyerno.

Giklaro usab sa Kalihim nga may gidawat nga tabang sa gobyerno ang mga benepisyaryo sa 4Ps ug ang P200 matag buwan o P2,400 sa usa  ka tuig dugang tabang lamang sa gobyerno.  (ECB/PIA7 Bohol)