CEBU CITY, Cebu, April 9 (PIA) -- Ang Cebu Port Authority (CPA) mihan-ay na sa ilang mga pagpangandam alang sa umaabot nga Semana Santa nga magsugod karong Abril 11 hangtod 17 kung diin gilauman nga daghang mga pasahero ang mouli sa ilang tagsa-tagsang mga probinsya human nga ang maong kasaulogan naapektuhan sa pandemya sa miaging duha ka tuig.
Sa nagkaduol nga kasaulogan sa maong okasyon, anaa sa 250,000 ka mga pasahero ang gilauman nga mosulod sa probinsya sa Sugbu busa ang CPA sa ilang bahin mihapsay na sa tanan nilang preparasyon kung diin ang ilang tumong mao ang hapsay og luwas nga pagbyahe sa mga pasahero karong Semana Santa.
Sa miaging episode sa Kapihan sa PIA niadtong Abril 6, gipadayag ni CPA Public Relations Officer Maryknoll Bolasa ang pagpangandam nga gibuhat sa ahensya alang sa pagsaulog sa Semana Santa.
“Rest assured that we in CPA is doing our best for the preparations to ensure that we will have a peaceful holy week celebration considering also that some of our ports are still undergoing repair and rehabilitation due to the damages sustained due to TY Odette," si Bolasa miingon
“We also appeal to the public to give their full participation in ensuring a safety trip for all passengers” dugang sa opisyal.
Kabahin nini, ang ahensya mopatuman sa “Oplan Biyaheng Ayos: Semana Santa 2022” gikan Abril 10 hangtod 18, kung diin ang tinguha mao ang paghatag og hugot nga seguridad sa pagsiguro sa kaluwasan sa mga pasahero ug sa kahapsay sa mga byahe gikan og pasulod sa probinsya.
Ubos niining "Oplan Biyaheng Ayos: Semana Santa”, adunay ibutang nga mga Malasakit Help Desk sa 16 ka mga pantalán nga anaa sa pagdumala sa CPA aron mahatagan og epektibong tubag ang mga panginahanglan sa mga pasahero.
Mopakatap usab og mga first-aid responders ug mga standby ambulance ngadto sa mga pantalan nga maoy motabang sa higayon nga adunay mahitabong dautan nga kahimtang sa mga pasahero.
Samtang nakig-alayon usab ang CPA sa ilang mga maritime partners sama sa Maritime Industry Authority (MARINA) ug Philippine Coast Guard (PCG) alang sa seguridad sa mga pantalan ug sa hapsay nga pagpatuman sa mga byahe ug uban pang mga kalihokan nga adunay kalambigitan sa mga pasahero niining umaabot nga Semana Santa.
Sa giatangan nga pagdagsa sa mga pasahero, ang CPA mipahimango sa tanang mobyahe nga dili moadto sa pantalán kung walay advance nga booking schedule aron malikayan ang kahasol ug alang pud dili maka dugang sa bagang duot sa katawhan nga anaa sa maong lugar. (RGC/PIA7)
