TAGBILARAN CITY, Bohol, April 6 (PIA) -- Mangandam na usab sa lain nga pagkapawong sa sugang dagitab alang sa mga panimalay ug establisemento nga nakabalik na ang serbisyo sa koryente.

Nagpahibaw ang National Grid Corporation of the Philippines (NGCP) sa usa ka power advisory niini nga giluwatan nga karong umaabut nga Sabado, Abril 9, 2022, masinati ang pagkapawong sa sugang dagitab sugod sa alas 4:00 sa sayo nga kabuntagon hangtud sa alas 6:00 sa hapon.

Ang 14 ka oras nga pagkapalta sa serbisyo, tungod kay ibalik na pagtaud ang temporaryo nga kutay sa bag-ong nahuman nga espesyal nga mga tore nga gipabarug isip permanente na nga tore nga modawat sa kutay sa 138 KV nga linya gikan sa Carlos P. Garcia ngadto na sa Ubay.

Kahinumduman nga kini usab nga linya ang nadaut human ang espesyal nga tore nga gikabudan sa high voltage nga korente dinhi, nalumo human gipabutalid ni Odette.

Ang pagkahagsak sa tore maoy kina-ingnan sa pagkapawong sa suga sa Bohol sulod sa dul-an duha  ka buwan.

Sa pagkahanaw sa supply gikan sa Leyte tungod sa naguba nga tore, napugos ang Bohol sa paggamit sa mas mahal ug mas di kasaligang suplay sa korente gikan sa krudo nga gipagawas sa Power barge ug pipila ka makina nga nagsuplay sa temporyong korente.

Nahibalik lamang ang barato nga korente diha nga nagpabarug ang NGCP og mga tore was ilang Emergency Restoration Systems (ERS) nga maoy temporaryong gikabudan sa mga high voltage nga linya.

Karong Sabado, ibalik na ang linya gikan sa temporaryong tore niini, paingon ngadto sa bag-ong special towers, pasabut sa NGCP.

Ug sanglit ang trabahoon mao man ang linyoa nganagsuplay sa labing dakong tinubdan sa koryente sa Bohol, segurado nga alang sa kaluwasan sa mga trabahante nga magsumpay sa linya ug magpakutay og balik sa koryente sa special towers 39 ug 40, pawngon gyud kini.

Hinuon, mipasalig ang NGCP nga ibalik nila dayun ang gahum dagitab kon mahuman na kini nila og trabaho. (RAHC/PIA7 Bohol)