CEBU CITY, Cebu April 21 (PIA) -- Ang Cooperative Development Authority (CDA) isip miyembro sa Poverty Reduction Employment and Reduction Cluster (PRLEC), nagpadayun sa ilang mga kalihokan pagpahibaw ug pagpasabot sa mga programa sa mga kooperatiba ilabi na ngadto sa gitawag nga mga ELCAC communities.

Ang CDA miingon nga sub-sub karon ang ilang kampanya pinaagi sa pagpahigayon og mga information campaigns aron ihatud ang mga programa ug benepisyo nga mahatag sa mga tawo nga mosulod og kooperatiba. Dinhi sa Central Visayas, ang maong ahensya nag sentro sa implementasyon sa ilang mga programa ngadto sa mga gi-ilang ELCAC-affected nga lugar o probinsya sama sa Negros Oriental ug Bohol.

Matod sa CDA, nakig-alayon usab sila sa mga community organizers nga maoy natahasan nga mangulo sa matag programa o serbisyo nga ilang ipatuman pinaagi sa pakig-uban niining mga kooperatiba.

Samtang nakig-uban usab ang maong ahensya sa ubang mga stakeholders ug mismong mga lumulupyo sa mga nagkadaiyang komunidad.

Sa programang "KASAYURAN" miadtong Abril 20, si Gracia Nenita Banogon, ang in-charge sa Cooperative Research Information and Training Section sa Cooperative Development Authority, misapabot sa importansya nga gibitbit nining mga kooperatiba sa pagpalambo sa kinabuhi sa mga lumulupyo.

"Cooperatives are economic vehicles, and they are much willing to assist our people kay built in naman daan ang mga mechanisms for cooperation and partnership sa mga localities," si Banogon miingon.

Apan gipadayag usab niya nga dakong hagit sa CDA ang lig-on nga pagpasabot kabahin sa kooperatiba ug mga programa niini kung diin nagkinahanglan kini og mga core groups aron nga mapadayun ang pagpahibaw ngadto sa mga komunidad.

Usa sa mga programa sa CDA mao ang "Koop Kapatid" kung diin sila nakig-alayon sa mga dagkong kooperatiba aron matabangan ang mga gagmayng kooperatiba pinaagi sa paghatag og teknikal ug pinansyal nga suporta.

Dugang niini, ang ahensya motumong usab sa uban nilang programa sa pagtabang sa mga Micro and Small Enterprises (MSEs) nga adunay kapital nga di mo ubos sa 3 milyones og 15 milyones ka pesos, aron kini nga mga negosyo magpabilin sa ilang operasyon ug ang mga lumulupyo makapadayon usab sa ilang mga panginabuhi.

Alang sa paspas ug epektibong pagpakatap ug pag implementar sa ilang mga programa, ang CDA uban sa mga kooperatiba, nanginguha nga mas mapalambo pa ang ilang operasyon sa pagpahiangay niini ngadto sa mas modernong pamaagi. (RGC/PIA7)