PAGADIAN CITY, May 11 (PIA)—Pormal nga gideklarang mananaug sa lokal nga eleksyon sa lalawigan sa Zamboanga del Sur ang Team Yu-Ariosa kaganinang kadlawon, Mayo 11sa hawanan sa Sangguniang Panlalawigan.

Gituboy na sa kadaugan sa Provincial Board of Canvassers sila Governor Victor J. Yu, Vice Governor Roy Ariosa ug 1st District Congresswoman Divina Grace Yu, 2nd District si Congresswoman Victoria Yu ug ang mga miembro sa Sangguniang Panlalawigan.

Si Gov. Victor Yu mitala og 291,227 total votes samtang si Vice Gov. Ariosa nakaangkon og kinatibuk-ang boto nga 241,920. Si Cong. Divina nakaangkon sa 166,432 nga kinatibuk-ang boto, samtang si Cong. Victoria nakatala sa 104,055 nga kinatibuk-ang botos.

Sa segundo distrito, midaug ang lima ka mga board members sa Team Yu nga sila John Regala, Atty. Dang Mariano, Loloy Poloyapoy, Bebie Abrenica Vidad ug ang newcomer nga si Nanding dela Cruz.

Samtang sa unang distrito, upat lamang ang nakakuha sa pwesto sa Team Yu nga mao sila Julu Dacal, Roger Saniel, Francisvic Villamero ug Mapi Obaob. Pormal na usab nga giproklamar sa kadaugan ang mga konsehal sa Pagadian nga sila Dr. Ariel Lim, Kai-kai Asugas, Allen Ariosa, Aiko To, ug Jun Bajamunde.

Sa iyang mensahe, si Gov. Victor Yu ang mapasalamaton sa mainitong suporta sa katawhan sa lalawigan ug sa tibuok bando nga maoy naghatod sa ilang kadaugan aron ipadayon ang legasiya sa matinud-anong pagserbisyo sa lalawigan. (with reports from Marlon Panares/PPB/GCC-PIA Zamboanga del Sur)