TAGBILARAN CITY, Bohol, May 24 (PIA) -- Gi-awhag sa Department of the Interior and Local Government (DILG) ang mga local government unit (LGUs)  sa nasod sa pagpalabang og mga ordinansa kalabot sa pagpatuman sa “No CCTV, no Business Permit” nga palisiya.

Matud pa ni DILG Kalihim  Eduardo Año, Chairperson sa National Peace and Order Council nga karong nibalik na ang katawhan sa ilang pre-pandemic nga kalihokan,  angay nga himuong prayoridad sa mga LGU ang kaluwasan sa publiko.

Giingong dakung tabang sa pagseguro sa public safety, kun himuong requirement sa  mga lungsod ug munisipalidad ang pagbutang og mga closed-circuit television (CCTV) systems, sa pagkuha og business permits sa mga establisyemento nga adunay daghang mga kostumer, ug kadtong mga risk o hazard-prone.

“Kailangang pangunahan ito ng LGU partikular ng kanilang Sanggunian sapagkat malaki ang ambag nito [CCTVs] sa laban natin kontra kriminalidad,” awhag pa ni Año.

Pinaagi sa DILG Memorandum Circular (MC) No. 2022-060, miingon si Año nga apil sa mga establisyemento nga angay adunay CCTVs ang mga financial establishments sama sa mga bangko, pawnshops, money lenders, ug money remittance services ug  mga susama niini; mga business establishments nga daghang sangay; shopping malls, shopping centers, supermarkets, wet markets; ug medical facilities, klinika ug laboratory.

Apil usab ang mga lugar nga entertainment sama sa mga theaters, movie houses, perya, internet cafes, arcades ug uban pang lugar nga naka-agni og daghang kustomer; airports, public transportation terminals, parking lots ug mga susama nga establisyemento nga ginaadtuan sa daghang sakyanan sama sa car dealerships, gasoline stations, vehicle maintenance/service stations; ug uban pang susama nga establisyemento nga daghang manginahanglan og CCTV cameras.

Matud pa nga daku ang tabang sa mga CCTV footages sa pagresolba sa mga krimen, nga napamatud-an na sa mga milabay nga panahon. (ECB/PIA7 Bohol)