TAGBILARAN CITY, Bohol, May 30 (PIA) -- Naglaom ang gobyerno sa Pilipinas nga makakuha og posibleng bag-ong grant sa gobyerno sa People’s Republic of China aron mapondohan ang usa ka gisugyot nga iconic o iladong tulay nga nagdugtong sa isla sa Panglao ug sa syudad sa Tagbilaran sa lalawigan sa Bohol.
Matud pa ni Department of Public Works and Highways (DPWH) Undersecretary for Unified Project Management Office (UPMO) Operations Emil K. Sadain, nagpaabot sila sa pag-apruba sa opisyal nga development assistance pinaagi sa grant gikan sa China alang sa gisugyot nga Panglao-Tagbilaran City Offshore Bridge Connector (PTCOBC) Project.
“We are looking forward at the approval of official development assistance through a grant from China for the proposed Panglao-Tagbilaran City Offshore Bridge Connector (PTCOBC) Project,” matud pa ni Sadain.
Una nang giseguro sa DPWH karong tuig 2022 ang “go signal” sa National Economic and Development Authority (NEDA) Board alang niining proyektong tulay ug nagsumite na sila sa mga kinahanglang dokumento sa Department of Finance (DOF) nga kinahanglan sa pagkuha og grant financing.
Niadtong tuig 2020, ang P6.955 bilyon nga proyekto gikumpirma sa DOF nga naa ubos sa China grant sa Economic and Commercial Counselor sa Chinese Embassy sa panahon sa preparatory meeting alang sa Philippines-China High Level Meeting.
Gibutyag ni Usec. Sadain, Chief Implementer sa Build Build Build Program ang planong upat ka lane nga 2.7-kilometrong PTCOBC Project nga magdugtong sa mainland Bohol sa mga islang munisipalidad sa Dauis ug Panglao iapil ang iconic nga cable-stayed nga disenyo.
Gikonsiderar ang taas nga economic rate sa investment return sa PTCOBC Project, gitan-aw usab sa DPWH isip opsyon ang suporta sa financing sa Japan International Cooperation Agency (JICA) ubos sa Urgent Bridges Construction Project for Rural Development (UBCPRD), Phase II – Component 1 nga may kinatibuk-ang gitas-on nga 4,088 metro ug gilangkoban sa 3 ka uban pang iconic nga tulay sama sa New Mancatian Bridge sa syudad sa Porac/Angeles, Pampanga; Liloan Bridge, Liloan, Southern Leyte; ug Butuan Bridge, syudad sa Butuan, Agusan Del Norte. (ECB/PIA7 Bohol)
