TAGBILARAN CITY, Bohol, May 30 (PIA) -- Gimanduan sa National Telecommunications Commission (NTC) ang mga telecommunications companies sa pag-isyu og alerts batok sa spam text messages nga nagtanyag og trabaho nga may taas nga sweldo.

Sa bag-o lang gipagawas nga abiso sa NTC, gimanduan niini ang mga kumpanya sa telcos nga Globe, Smart ug DITO sa pagpadala o mag-send og text blasts sa ilang mga subscribers gikan Mayo 28 hangtod Hunyo 4, 2022 nga may mensaheng: “Babala: Huwag pong maniwala sa text na naga-alok ng trabaho na may pangako ng malaking sweldo, ito po ay scam.”

Gihatagan og palugit ang telcos hangtod Hunyo 8, 2022, aron makasumite sa ilang compliance report.

Gimando usab sa NTC sa mga regional directors ug officers-in-charge nga mogawas sa mga lokal nga radio ug television stations aron tambagan ang publiko batok sa fraudulent text scams gikan Mayo 28 hangtod Hunyo 11, 2022. May hangtod Hunyo 15, 2022 sila aron moduso og compliance report.

Una nang nipasidaan ang mga technology experts batok sa spam messages, ug giingong nagpasa ang mga scammers og mga ingon niining mensahe aron makakuha og personal nga detalye sa mga biktima.

Kahinumdoman nga niadtong buwan sa Abril, wala lagda-i ni Presidente Rodrigo Roa Duterte ang balaodnon nga mandatory registration sa tanang SIM cards ug social media accounts, tungod kay giingong kinahanglan pa kini og mas makuting pagtuon. (ECB/PIA7 Bohol)