TAGBILARAN CITY, Bohol, June 17 (PIA) -- Gipahibalo sa Land Transportation Franchising and Regulatory Board (LTFRB) Rehiyon 7 nga ilang gi-uswag ang Service Contracting Program Phase 3 nga Libreng Sakay alang sa piniling Provincial Buses taman Hunyo 26, 2022.
Ang provincial buses magsugod og balik sa ilang operasyon sa Libreng Sakay sa Biyernes, Hunyo 18, 2022 ug mag-deploy og 2 ka units matag rota.
Ang Libreng Sakay anaa matag weekends o katapusan sa semana gikan Biyernes taman Domingo hangtod sa Hunyo 26, 2022.
Ang probinsyal nga rota sa lalawigan sa Bohol nga gi-uswag ubos sa Service Contracting Program — Libreng Sakay sa Rehiyon 7 mao ang : Tagbilaran City - Panglao Airport via Dauis, Lourdes-Tawala-Danao-Panglao Municipal hall; Tagbilaran City - San Jose, Talibon via Tubigon; Tagbilaran City - Talibon via Balilihan-Carmen; ug Tagbilaran City - Mabini vv.
Gipadayon sa LTFRB7 ang Libreng Sakay sa Provincial Public Utility Buses tungod na usab sa hangyo sa daghang mga pasahero sa maong mga rota.
Ang Department of Transportation (DOTr) ug ang Land Transportation Franchising and Regulatory Board (LTFRB) Rehiyon 7 nagpasalamat sa mga konduktor, drivers, ug operators sa ilang padayon nga serbisyo ngadto sa mga mananakay. (ECB/PIA7 Bohol)
