TAGBILARAN CITY, Bohol, June 15 (PIA) -- Nipasidaan ang Philippine Overseas Employment Administration (POEA) sa publiko batok sa mga nikatap nga text message nga nagtanyag og trabaho sa ubang nasod.

Giklaro sa ahensya nga dili gikan sa POEA ang maong text message.

Matud pa nga ang maong text message usa  ka phishing scam diin adunay link nga kun e-click, ma-redirect kini sa usa ka website nga mahimong makuha ang inyong mga personal data sama sa password, account number o uban pang mga sensitibong impormasyon ug magamit sa mga ilegal nga buhat.

Kalabot niini, gitambagan ang publiko nga dili tagdon o papason na lamang ang nahisgotang text message tungod kay dili kini gikan sa ahensya.

Gi-awhag usab sa POEA ang publiko nga makiag-alayon lamang kanila ug sa accredited recruitment agencies kun gustong mo-apply og trabaho sa ubang nasod.

 Nipasidaan na usab ang National Telecommunications Commission (NTC) nga dili motuo sa mga text nga nagtanyag og trabaho nga adunay pasalig nga dakong sweldo. (ECB/PIA7 Bohol)