TAGBILARAN CITY, Bohol, June 21 (PIA) -- Opisyal nga gipadayag sa mayor sa Catigbian ang napupo nga mga pasidungog sa lungsod human sa unang tulo ka tuig niyang paglingkod isip inahan ug labing taas nga opisyal didto.

Atul sa iyang State of the Municipality Address (SOMA) nga gibatbat sa mayor isip panak-op nga kalihukan sa tulo ka adlaw nga kasaulogan sa ika-73 nga katuigan human sa pagkatukod sa lungsod ug sa ika-17 nga Katigbawan Festival.

Sa pagpaningkamot sa mga tinugyanan sa lungsod, inubanan sa pagpakigtambayayong sa mga nasudnong ug probinsyal nga kagamhanan, napataas sa lungsod ang ilang Competitiveness Index gikan sa ika 96 nga lugar sa 2020, nagdto na sa ika 31 nga lugar sa 2021.

Sa Annual Ranking of Cities and Municipalities Competitiveness Index (CMCI) sa Catigbian, subay sa kinatibuk-an nga scores sa upat ka haligi sa pagpasayon sa pagsugod og negosyo sa lungsod, daku nag giambakan ang lungsod nga posibleng makadani sa mga mamumuhunan.

Ang score sa lungsod nga nakig-ambas sa nga kalungsuran ug syudad sa Pilipinas, gikuha sa maayong bansay sa pagpadagan sa ekonomiya, maayong serbisyo ngadto sa katawhan, pagpundar sa mga imprastraktura, ug pagpangandam aron makasagubang sa katalagman.

Nunot niana, ang Catigbian nahimong sagunson na sa pagkuha sa Seal of Good Financial Housekeeping gawas pa nga gitanyagan sa Commission on Audit sa pasidungog isip labing hawod kay walay nakita sa mga auditors nga sayop sa ilang mga financial reports.

Kini nakuha sa lungsod sulod sa tulo na ka tuig nga siya naglingod, matud sa mayor didto sa iyang SOMA.

Sa pagparehistro sa ilang mga mag-uuma, sa 27 ka kalungsuran nga gipailawom sa insurance coverage sa agri-fishery stakeholders sa tanang programa sa Philippine Crop Insurance Corporation, nakuha sa lungsod ang ika tulo nga labing taas nga insurance coverage, segun pa sa pasidungog nga gihatag sa Department of Agriculture. 

Ika duha usab sila sa insurance coverage sa tanan nga katangan ug pwede nga ipaseguro nga nakalista sa Registry System for Basic Sector in Agriculture (RSBA), dugang pang pasidungopg gikan sa DA.

Mikabat sa 3,192 ka agri-fishery stakeholders ang nakapa-insura sa ilang mga pananom, hayupan ug mga kabtangan sa panguma niadtong 2021.

Top 10 Best Performing LGU usab ang lungsod alang sa Ecological Solid Waste Management Best Practices alang sa 2018-2020, pasidungog nga tanyag sa Provincial Government sa Bohol niadtong 2021.

Kini samtang gidawat usab sa mayor ang 2018 Seal of Child Friendly Governance sa iyang paglingod sa 2019, gawas pa nga nagkatagak ang ganti sa lungsod niadtong Disyembre 2019 dihang 1st Runner Up sila sa Daygon Contest, nakuha pa nila ang Pagtinabangay Award sa Belen Contest sa 2019, bisan pa nga finalist sila sa Belen Contest niadtong tuiga.

Gikan sa Philippine Red Cross, nakuha usab sa lungsod ang Dugong Bigay, Dugtong Buhay Award sa 2019, gawas pa sa Haligi ng Dangal People’s Choice Awards gikan sa National Commission for Culture and the Arts karong tuiga.

Alang sa mayor, sa iyang unang termino, bisan pa sa hagit sa pandemya, Odette ug sa nagkamahal nga presyo sa paliton tiungod sa mga kaguliyang gawas sa nasud, basta magpadayon lamang ang tinabangay, pagpakig-alayonay ug paghilambigitay sa katawhan sa lungsod, walay dili makab-ot nga kadaugan. (RAHC/PIA7 Bohol)