CEBU CITY, Cebu July 16 (PIA) -- Padayon ang Department of Agriculture Region 7 (DA7) sa pagpatuman sa ilang mga nagkadaiyang programa kabahin sa pagpalambo sa urban farming ug community gardening dinhi sa Central Visayas, kini dungan usab sa mahingusganon nga pag-awhag sa mga Sugbunaon nga modangat sa maong proseso sa pagpananom.
Ang urban farming mao ang naila nga proseso sa pagpananom ug mga utanon ug uban pang matang sa mga crops kung diin kini pagabuhaton ngadto sa mga kalungsuran o mga urban areas.
Ug aron mapalig-on ang pagpaduol niini nga aktibidad ilabi na ngadto sa mga urban households dinhi sa Rehiyon 7, gipatuman sa ahensya sa agrikultura ang Plant, Plant, Plant program nga ang tumong mao ang pagpanghatag ug mga lain-laing vegetables seedlings, seeds, ug organic fertilizers nga magamit sa mga benepisyaryo niini sa pagsugod nila ug urban farming ngadto sa ilang mga matag-tugkaran.
Pinaagi sa maong programa, ang mga indibidwal o pamilya nga nagpuyo sa mga urban households mamahimu usab nga makadawat ug mga agricultural tools ug makapahimus sa libre nga mga trainings kabahin sa saktong pagpatubo sa ilang mga tanom ug sa pagpalambo usab sa ilang abilidad pagbuhat sa tukmang proseso sa urban gardening.
Subay sa pagpahingusog sa ilang kampanya pagpaila sa urban farming ngadto sa katawhan, gipaambit usab sa DA7 ang mga tabang ug benepisyo nga matanyag sa urban farming sama sa pag produce og luwas ug himsog nga mga pagkaon ug pag edukar sa mga kabatan-onan kabahin sa proseso sa produksyon sa pagkaon.
“Ang focus karon kay ma food secure ta, even households lang kay maka produce og pagkaon kung gustoon natu kini pinaagi sa urban farming, another benefit is naay local source of food, maka bonding usab ang mga pamilya sa pagpananom, ma educate ang atong mga youth kung asa gikan ang pagkaon, ug makakita na sila og value kabahin sa proseso sa pagproduce sa pagkaon,” matod ni Nimfa Davis, Senior Science Research Specialist sa DA7.
Apan labaw niini gipadayag sa ahensya nga ang labing dakong benepisyo sa urban farming mao ang paghatag ug suporta sa pagpalambo sa food sustainability ug food security sa nasud.
Padayun usab karon nga nag-awhag ang DA7 sa publiko ilabi na sa katung mga urban households nga buhaton ang urban farming ug community gardening aron sa pagtabang sa pagpalambo sa suplay sa pagkaon.
“Among gina encourage ang tanan especially katung mga urban households nga mananom gyud kay naa pud tay responsibility nga maka contribute ta sa atong pagkaon especially these times na pandemic. Kay dili lang ang farmers ang nay moral obligation when it comes to food security kung dili apil napud ang publiko. Kung naa ta sa urban areas, yes limited ang spaces pero pwede ra gihapon kita makapananom using containers,” kini saysay ni Ana Luz Mislos ang Urban Farming Focal Person sa DA7. (RGC/PIA7)
